میدان وردګ: طالبانو د «دشت توپ» امنیتي بیس له ټول پرسونل سره یوځای نیولی
عزم یکشنبه،۱۳چنګاښ،۱۴۰۰): راپورونه وایي چې طالبانو د میدان وردګو ولایت د دشت توپ په نامه ستر امنیتي بیس له ټولو، وسایلو وسایطو او نور پرسونل سره یوځای نیولی دی.
د دشت توپ سیمه چې د میدان وردګو د سیدآباد ولسوالۍ اړوند ده، یو له خورا ستراتیژیکو او مهمو سیمو شمیرل کیږي او ښکیلو خواوو ته یې جغرافیایي جوړښت خورا د اهمیت وړ دی.
دغه سیمه کې امریکایي ځواکونو هم بیسارې پانګونه کړې وه او په څنګ کې یې د پولیسو یو روزنیز مرکز هم جوړ شوی وه.
طالبانو ویلي چې د یاد امنیتي بیس د نیولو پرمهال یې شاوخوا ۴۳ ټانګونو او ۷۶ عرادې رینجر موټرو په ګډون ۱۸۶ عرادې بیلابیل وسائط لاس ته لویدلي دي.
طالبانو په یاد امنیتي بیس کې د خورا ډیرې سپکې او درنې وسلې او نورو مهماتو د نیولو خبر هم ورکړی دی.
تر دې وړاندې طالبانو د یادې ولسوالۍ اړوند د سلطانخیلو په نامه ستر امنیتي بیس هم تر خپل کنترول لاندې راوستلی وه.
د دشت توپ امنیتي بیس او اړوند سیمې په نیولو سره یې اوسمهال د یادولایت مرکز او بهسودو ولسوالۍ له دولتي عسکرو سره پاتې دي، نور یې ټولې ولسوالۍ تصفیه شوې دي.