په جوزجان کې د مرخېړیو تخم د تولید لومړنی لابراتوار جوړ شو
عزم(پنجشنبه، ۱۷، چنګاښ ۱۴۰۰): د کرنې، اوبو لګولو او مالدارۍ وزارت وايي، په جوزجان کې د لومړي ځل لپاره د مرخېړیو تخم د تولید لومړنی لابراتوار جوړ شو.
له یاد وزارت څخه په خپره شوې خبرپاڼه کې ویل شوي، په دغه ولایت کې د مرخېړیو تخم د تولید لومړنی لابراتوار جوړ او ګټې اخیستنې ته سپارل شوی دی.
په خبرپاڼه کې د جوزجان د کرنې رییس شفیق الله تلاش له قوله ویل شوي، چې په دغه لابراتوار او ودانۍ یې ۳ مېلیونه افغانۍ لګول شوي دي.: «یاد لابراتوار د دې ادارې په ترکیب کې به ډېر ژر خپل تولیدي فعالیتونه هم پیل کړي او اوسمهال د دې مرکز پر نورو مسایلو کار روان دی.»
یاد لابراټوار ددې ترڅنګ، چې د شبرغان ښار ۳۸۰ مېرمنو ته به د مرخېړیو تخم تولید کړي، د بلخ، سرپل او فاریاب ولایتونو د هغو مېرمنو اړتیاوې هم پوره کړي، چې د مرخېړیو کرکېله کوي.
د شبرغان په ښار کې ۳۸۰ مېرمنې د مرخېړیو د کرکېلي او حاصل ټولولو په برخه کې فعالیت کوي او ددې لابراټوار د فعالیت په پیل سره، مرخېړیو تخم ته ددغو مېرمنو لاس رسی اسانه کېږي.
له تېرو څو کلونو راهیسې په هېواد کې د مرخېړیو کرکېله پیل شوې ده، چې هر کال ترې لسګونه ټنه حاصلات راټولېږي او ګڼ شمېر یې بهر ته صادرېږي.