کروندګر: حکومت دې د سبزیو او میوو له پاره ښه بازارونه جوړ کړي
عزم (یکشنبه، ۲۸ وږی ۱۴۰۰): په داسې حال کې چې د یخو او واورینو سیمو میوې او سبزې پخوالي ته رسېدلې، کروندګر او بزګران تمه لري، چې حکومت به یې د بازار موندنې غم وخوري.
دوی وايي: پخوا به یې چې د کروندو او باغونو حاصلات ورسېدل نو د خراب بازار او اخیستونکو د کمښت له امله مجبور وو، چې په نیمه بیه یې وپلوري.
د کروندګرو په خبره: دې چارې دوی ته سخت تاوان رساوه او ان د بل وار کښت پیسې یې هم نشوې ترلاسه کولی.
دا په داسې حال کې ده چې تازه په سړو سیمو کې د باغونو او کروندو انګور، مڼې، انار، رومیان او پیاز بازارونو ته د خرڅلاو له پاره په ډیره کمه بیه را ویستل شوي دي.
د کلید ګروپ د یو راپور له مخې: اوسمهال په کابل، لوګر، پکتیا، غزني او میدان وردګو کې د یو من رومیانو بیه له ۲۵ تر ۴۵ افغانیو، د پیازو بیه له ۵۰ تر ۸۰ او انګور له ۷۰ تر ۱۰۰ افغانیو پورې خرڅیږي.
راپور زیاته کړې: لا هم کروندګر کور دننه او په نړیواله کچه د بازار او مارکیټ له نشتون سر ټکوي او مجبور دي چې د تېر په څیر تاوان ته غاړه کیږدي.
د نوي حکومت چارواکو، د سوداګرۍ خونې او اقتصاد وزارت په دې اړه څه نه دي ویلي؛ خو وړاندې یې څرګنده کړې وه چې د هوايي پروازونو په پیلدلو سره به نورې نړۍ سره سوداګریزه راکړه ورکړه بیا پیل شي.
باید وویل شي چې د افغانستان زیاتره تولیدات، سبزي، تازه او وچې میوې ګاونډیو هېوادونو، خلیج او ان اروپا ته صادریږي.