هلمند کې ویجاړ شوي پلچکونه بېرته رغول کېږي
عزم(یکشنبه، ۰۲ لړم، ۱۴۰۰ل): د هلمند ښاروالي وايي، د مرکز لښکرګاه ښار اړوند به ټول ویجاړ شوي پلچکونه بېرته ورغوي.
د هلمند له ښاروالۍ څخه په خپره شوې خبرپاڼه کې ویل شوي، ویجاړ شوي پلچکونه به په معیاري ډول ورغول شي.
د هلمند ښاروال احمد سعید انصاري وايي، د هلمند ښاروالۍ د انجینرۍ ډلې له لوري د پلچکونو ډېزاین بشپړ شوی او چارې هم یې پیل شوي دي.:«قراردادي شرکت ته ویل شوي چې د انجینرۍ د معیارونو پر بنسټ او ډېر ژر ویجاړ شوي پلچکونه ورغوي، چې ښاریان له ګڼ شمېر ستونزو څخه وژغورل شي.»
د ښاغلي انصاري په خبره، د لښکرګاه ښاروالۍ د ځمکو د غصب د مخنیوي چارې هم پیل کړي او د لښکرګاه ښاروالۍ د مارکېټونو د تنظیم مدیریت له لوري د احمد شاهي مېنې په سیمه کې یې د پینځه جریبه ځمکې د خپلسري تصرف مخه نیولې ده.
دی وايي، هېچاته به اجازه ورنه کړي چې ځمکې په خپلسري ډول ډول تر تصرف لاندې راولي او یا یې غصب کړي.
تېر حکومت د هلمند د سقوط پر مهال په مرکز لښکرګاه ښار ګڼې بمبارۍ وکړې، چې له امله یې روغتونونه، سړکونه، پلچکونه او نور عامه ځایونه ویجاړ شول.