فضا او د کائناتو وُسعت / نولسمه برخه

سردار ناطق الحق (امین)
مشتري:
د شمسي منظومې پنځمې سیارې ته مشتري وایي، چې د مریخ او زحل تر منځ واقع ده.
مشتري لومړنۍ ګازي سیاره ده چې (په اوسطه پیمانه) حدوداً آته سوه (۷۷۷۹۲۰۰۰۰۰۰۰) میلیونه کیلومتره د لمر له کتلې څخه لیرې څرخیږي او له ځمکې سره بیا (په نږدې ترینه نکته کې) پنځه سوه آته اتیا (۵۸۸۰۰۰۰۰۰) میلیونه کیلومتره فاصله لري.
د مشتري حجم د ځمکې څه باندې دیارلس سوه (۱۳۲۱) برابره دی! یعنې د مشتري په منځ کې د ځمکې په اندازه دیارلس سوه (۱۳۰۰)کُرې ځاییږي.
مشتري لکه د عطارد، زهرې، ځمکې او مریخ، یا د ځینو اقمارو په توګه- جامده سطحه نه لري! ځکه چې مواد یې ټول ګازي دي؛ نو که کوم وخت انسان (د تکنالوجۍ په وسیله او د الله په اجازه) موفق شو چې ځان تر مشتري و رسوي او له اتمسفر څخه یې هم ور تېر شي، نو وار له مخې به یې هستوي جاذبه زړه ته کش کړي ؛ ځکه چې هم د مشتري جاذبه قوي ده او هم مشخصه سطحه نه لري.
د مشتري سیاره له مختلفو ګازاتو څخه تشکیل شوې چې پنځه اویا (۷۵%) سلنه یې هایدروجن، څلرویشت (۲۴%) سلنه هیلیوم او یوه (۱%) سلنه یې نور ګازات دي.
دا چې مشتري سطحه نه لري، نو موږ ته یې فقط جفّ یا اتمسفر ښکاریږي، چې مختلف رنګونه لري او د دغه جفّ قطر حدوداً اویا (۷۰) کیلومتره اټکل شوی.
مشتري دومره شدید توپان لري؛ چې په یوه ساعت کې شپږسوه څلوېښت (۶۴۰)کیلومتره حرکت کوي.
دا چې د مشتري جاذبه ډېره قوي (یعنې د ځمکې دوه برابره) ده؛ ځکه خو نهه اویا (۷۹) سپوږمۍ لري! چې تر ټولو جالبه سپوږمۍ یې د آی او (IO) په نامه یادیږي، چې پر سطحه یې څلور سوه (۴۰۰) اورشیندي / آتشفشانونه هم موجود دي.
د مشتري یوه ورځ لس (۱۰) ساعته، مګر یو کال یې بیا د ځمکې د کال دوولس برابره (یعنې دوولس کاله) دی.
دا چې مشتري یوه بلا ده! او په تشو لسو (۱۰) ساعتونو کې یوه شپه او یوه ورځ جوړوي، نو سړی یقیناً حیران شي! چې محوري حرکت او ګردان به یې نو څومره تېز وي؟ بلې! بیخي تېز دی! یعنې په یوه ساعت کې دریڅلوېښت زره(۴۳۰۰۰) کیلومتره (ځای پر ځای) تاویږي؛ چې فزیک پوهان یاد حرکت ته، وضعي حرکت وایي.
د مشتري له پاسه چې کومې ورېځې ګرځي، هلته دماء منفي یوسل پنځه څلوېښت (°۱۴۵-) درجي د سانتګراد/ سلسیوس ده،
مګر د مشتري هستوي حرارت بیا څلوېښت زره (۴۰۰۰۰) درجې د سلسیوس اټکل شوی.
د یادې سیارې پر شاوخوا د خاورینو ذرو یو ډول کړۍ هم وجود لري؛ چې د مشتري له ورېځو څخه حدوداً دونیوي زره (۹۲۰۰۰) کیلومتره لوړې تشکیل شوې او بیا تر دوه لکه او پنځه ویشتو زرو (۲۲۵۰۰۰) کیلومترو پورې دوام لري، مګر ضخامت یې له دوه زره (۲۰۰۰) کیلومترو نیولې، بیا تر دوولسنیمو زرو (۱۲۵۰۰) کیلومترو پورې رسیږي.
ګرانه لوستونکه! اوس نو خامخا ووایه چې: سبحان الله!!! بیا ووایه چې؛ په ریښتیا سره الله ابرقدرت کامل دی او تر اوسه هېڅ داسې خیال او فکر نه دی پیدا شوی؛ چې فقط د دغه عظمت تصوُر لا پکې ځای شي.
او اې! آیا د مشتري دا عظیم جوسه سیاره مو په سترګو لیدلې ده؟
بلکل مو لیدلې! کله چې ماښام مهال لمر له موږ نه پټ شي، تاسو د شمال غرب لوري ته وګورئ! مشتري له لیرې ځلیږي! ستره نښانه یې دا ده چې: تر ټولو غټ ستوری (په هغه موقعیت کې) همدغه د مشتري غټه سیاره ده او له لیرې ځلیږي.
زما کلک یقین دی چې؛ په هره سیاره او هر آسماني جرم کې د الله مخلوق خامخا شته، چې موږ پر دوی نه یو خبر او دوی پر موږ نه دي خبر! خو یو حکمت د مشتري دا هم دی چې: له موږ څخه د سماوي قاتلو اجرامو او شهابونو پر وړاندې کلکه دفاع کوي! یعنې هره بلا چې زموږ پر خوا راځي او مسیر یې له مشتري سره نږدې وي – نو هغه نیکه یې لا نشي ترې راتېرېدلای، بلکې برمته کوي او بندي کوي یې، د ځان تابع یې ګرځوي او بیا یې (د نورو نهه اویا [۷۹] سپوږميو په توګه) له ځان څخه تاووي.
نور په بله برخه کې ان شاءالله

Related Articles

ځواب دلته پرېږدئ

ستاسو برېښناليک به نه خپريږي.

Back to top button
%d bloggers like this: