مسیر ورځپاڼه: پاکستان هغه مرسته نه کوي چي افغانان ورته اړتیا لري

عزم (سه شنبه، ۲۸مرغومی، ۱۴۰۰ل): مسیر ورځپاڼې د پاکستان د لومړي وزیر عمران په هغو خبرو توند غبرګون ښودلی دی، چې افغانستان به ځینې متخصصین واستوي.

ورځپاڼې لیکلي، د افغانستان اسلامي امارت ویاند ذبیح الله مجاهد ویلي چې دوی بهرنیو متخصصینو ته اړتیا نه لري او دغه چاره خپله پوره کولای شي.

«افغانستان ته د متخصصینو د لېږلو په تړاو د پاکستان د لومړي وزیر خبرو ته افغانانو سخت او توند غبرګون ښودلی دی. د پاکستان لومړي وزیر عمران خان د خپل هېواد له چارواکو غوښتي وو چې ”له دوستو هېوادونو سره همکارۍ ” وکړي او همدارنګه داسې متخصص کسان افغانستان ته واستوي چې د روغتیا، مخابراتو او بانکدارۍ په برخو کې وړتیاوې ولري څو په افغانستان کې د ‘بشري کړکېچ مخنیوی ‘ وشي. نوموړي د افغانستان وضعیت په هکله اندېښنه ښوولې وه او په وینا یې ”د اړتیا په وخت کې به افغانان هېر نه کړي”. د عمران خان خبرو ته د افغانانو غبرګونونه توند او تېز وو او ټولو په یوه خوله د پاکستاني متخصصینو راتګ رد کړ. په دې چاره کې د اسلامي امارت ملاتړي او مخالفین سره جلا نه وو او په امارت یې غږ کاوه چې ددې چارې مخه ونیسي. د اسلامي امارت ویاند ذبیح الله مجاهد هم ویلي چې دوی بهرنیو متخصصینو ته اړتیا نه لري او په افغانستان کې په پوره اندازه متخصصین شته چې حکومتي او نورې چارې مخ ته یوسي.»

د سرلیکنې له مخې، پاکستان له افغانستان سره په هغو برخو کې مرسته نه کوي چې اوسمهال افغانان ورته اړتیا لري، خو په هغو برخو کې د مرستو ژمنه کوي چې خلک او هم یې حکومت نه غواړي.

«واک ته د اسلامي امارت له رسېدو سره سم پاکستان له بېلابېلو لارو هڅه کوي چې وښيي دوی له افغانستان سره مرستو او ملاتړ ته ژمن دي. که څه هم په هغو برخو کې چې افغانستان یې له پاکستان غواړي مرسته نه کوي، خو ددې لپاره چې ځان مرستندوی وښيي په هغو برخو کې د مرستو د کولو خبرې کوي چې افغانان یې نه غواړي. واک ته د اسلامي امارت له رسېدو وروسته پاکستان د افغانانو پر مخ خپلې ټولې دروازې وتړلې، ویزې یې بندې کړې او هغو کسانو ته یې هم پاکستان ته د ورتګ اجازه نه ورکوله چې له وړاندې یې قانوني ویزې لرلې. پاکستان د افغان ناروغانو پر مخ هم خپلې دروازې وتړلې او آن ځیني ناروغان په تورخم او سپین بولدک کې مړه شول. په سختو ورځو کې له کابله تر اسلام اباده د پاکستانيPIA  شرکت د یوه ټیکټ بیه تر ۱۲ سوه ډالرو پورته کړې وه چې په عادي حالت کې دا بیه له سل تر یو نیم سل ډالره وه. اوس هم پاکستان افغانانو ته د عادي ویزو ورکړه درولې ده او آن ناروغانو ته په سختۍ او هغه هم د پیسو په بدل کې ویزې ورکوي.‌ که څه هم په دې برخه کې پاکستاني چارواکو بیا بیا د سهولتونو ژمنه کړې ده، خو په عمل کې یې ستونزې لا زیاتې کړي دي. پاکستان هغه مرسته نه کوي چې افغانان یې غواړي، خو هغه کوي چې افغانان یې نه غواړي. له همدې امله پاکستاني چارواکي په واقعي مانا له افغانستان سره د مرستو نیت او اراده نه لري. دوی په دې خبرو سره له یوه اړخه غواړي چې که په افغانستان کې ورته د لا زیات نفوذ زمینه برابره شي او له بله اړخه نړیوالو ته ښيي چې ګواکي دوی د افغانستان خواخوږي دي او مرسته ورسره کوي.‌»

د مسیر په باور، د عمران خان خبرو ته د خلکو غبرګون جدي او منفي وو او اړتیا ده چې د دغه ډول څرګندونو پر وړاندې د خلکو او حکومت غبرګون یو شان وي.

«د پاکستاني لومړي وزیر دغه ډول څرګندونو چې څه‌ ډول د خلکو غبرګون منفي و، دغسې د اسلامي امارت ویاند هم د پاکستان دا مرسته رد کړه. له دې وروسته هم پکار ده چې د پاکستان د هر ‍ډول لاسوهنې او نفوذ پر وړاندې خلک او اسلامي امارت دواړه په شدت غبرګون وښيي او بیا بیا دا ‍پیغام ورکړي چې په کابل کې واکمن د پاکستان د ناوړه سیاستونو پر وړاندې ولاړ دي او اجازه نه ورکوي چې دلته خپلو ناوړه موخو ته ورسېږي.»

Related Articles

ځواب دلته پرېږدئ

ستاسو برېښناليک به نه خپريږي.

Back to top button
%d bloggers like this: