طالبانو د مذاکراتو ترڅنګ مشورتي او تخنیکي ټیمونه هم په کار اچولي
(عزم چهارشنبه ۱۳۹۷ کب ۸)
قطر کې د طالبانو د سیاسي دفتر سرچینې وایي چې اوسمهال طالبانو د امریکایانو سره د سولې له خبرو سره یوځای څو ټیمونو ته دنده سپارلې چې د دغو خبرو په هکله مذاکراتي بورډ ته مشورې برابرې او تخنیکي اړخونه یې وسنجوي.
دغه ټیمونه کرۍ ورځ د مذاکراتو بهیر تعقیبوي او د پردې ترشا د مذاکراتو په هکله خپلې ارزونې کوي.
دواړه ټیمونه د طالبانو له مشرانو، سیاسي شنونکو، قانون پوهانو او د سیاسي برخې له مبصرینو سره په تماس کې دي او د هغوی مشورې او نظرونه ټولوي.
د طالبانو د سیاسي دفتر ویاند سهیل شاهین ویلي، ” په دواړو ټیمونو کې د سیاسي دفتر ټول غړي ځای پر ځای شوي او ټوله ورځ د مذاکراتي بهیر تر څنګ تیروي، تر څو پر وخت مشورې تهیه او د میز پر سر یې مذاکراتي ټیم ته په واک کې ورکړي“
د خبرو اجنډا بیا هم د امریکایانو پر بشپړ وتلو او له افغانستان څخه امریکا ته د زیان نه اړولو پر موضوع ورټوله ده.