غزني: د طالبانو په برید کې د خوګیاڼو امنیې قوماندان او ۲۰ عسکر وژل شوي
عزم(جمعه، ۴ زمری ،۱۳۹۸)دغزني ځایي چارواکي وایي، طالبانو تیره شپه د دغه ولایت پر خوګیاڼو ولسوالۍ تهاجمي برید کړی او ګڼو عسکرو ته یې مرګ ژوبله ور اړولې ده.
د غزنی د والي ویاند عارف نوري ویلي، دغه برید چې تیره شپه لس بجې پیل شو، پرمهال یې د یادې ولسوالۍ قوماندان سمیع الله پوپل په ګډون درې تنه عسکر وژل شوي او پنځه نور ټپیان دي.
نوموړي څلورو طالب جنګیالیو ته هم د مرګ ژوبلې اوښتو پخلی کړی دی.
بلخوا بیا طالبانو ویلي چې تیره شپه یې د خوګیاڼو ولسوالۍ په نقلي مرکز چې د غزني د مرکز اړوند کاریز سیمه کې موقعیت لري، بریدونه کړي چې د یادې ولسوالۍ د امنیه قومندان(سمیع الله) په شمول یې ۲۱ عسکر وژلي او ۱۰ نورټپیان کړي دي.
طالبان وایي د برید پر مهال دوی ته هیڅ راز زیان نه دی اوښتی.
د یادونې وړ ده چې دا په تیره څه باندې یوه میاشت کې د یادې ولسوالۍ دوهم د امنیې قوماندان دی چې د طالبانو برید کې ژوند له لاسه ورکوي، د روان کال د چنګاښ پر پنځمه نیټه هم د دغې ولسوالۍ د امنیې قومندان قادرشا د یوه ځای پرځای شوي ماین په چاودنه کې له خپلو ساتونکو سره یوځای وژل شوی وو