لوګر کې د ښوونکو د معاشونو نږدې ۱۰ ميلونه افغانۍ لوټ شوي
پل علم (عزم: سه شنبه، ۱۳ زمری ـ۹۴ ل) د لوګر ولايت د پوهنې چارواکي وايي چې تېره ورځ ماسپښين ناپيژاندو وسله والو د دغه ولايت د مرکز پل علم په پورک سيمه کې د محمد اغې ولسوالۍ د ښوونکو معاشونه لوټلي دي.
د لوګر د پوهنې مرستیال محمد صادق ستانکزي رسنيو ته وويل چې د محمداغې د پوهنې مدیریت پنځه تنه کارکوونکو غوښتل، چې ديادې ولسوالۍ د ښوونځيو دښوونکو معاشونه دغې ولسوالۍ ته ولیږدوي، خو د کابل ـ ګردیز د لويې لارې په اوږدو د پورک په سیمه کې لوټل شوي دي.
ستانکزی ويلي چې په دغه پېښه کې د محمد اغې ولسوالۍ د پوهنې مديريت یو تن وژل شوی او ۴ نور ټپیان شوي دي.
بله خوا د لوګر د امنیه قوماندانۍ مرستیال محمد ورا اندرابي ويلي چې په پیښه کې د محمداغې ولسوالۍ د سفیدسنګ د لېسې مدیر دلاور خان هم وژل شوی دی.
خو دلوګر ولایت د پوهنې ریاست ویاند شاپور عرب رسنيو ته وويل ، چې نږدې لس ميليونه یعنی (۹ میليونه ۷ لکه ۳۳ زره او ۸۰۰ ) افغانۍ، چې د ۱۰۲۵ ښوونکو معاشونه وو د نا پېژاندو وسله والو له لوري لوټل شوي دي.
ديادونې وړ ده چې څو مياشتې مخکې د ننګرهار پوهنتون د استادانو معاشونه هم په لاره کې د وسله والو غلو له لوري لوټل شوي وو.
په هېواد کې د ناامنۍ له امله اوس ګڼ شمېر سوداګر او د پېسو خاوندان د خپلو پېسو د خوندي توب او ځان په اړه اندېښمن دي ځکه چې وخت په وخت ځينې سوداګر او شتمن خلک د وسله والو غلو او انسان تښتوونکو له لوري تښتول کيږي او په بدل کې ترې پېسې غوښتل کیږي.
عبداللطيف نظيف