په بادغیس کې د زعفرانو د پروسس یو مرکز فعال شو
عزم(یکشنبه، ۲۴لیندۍ، ١٣٩٨ل): د بادغیس ولایت ځايي چارواکي وايي، د بادغیس په مرکز قلعهنو کې د زعفرانو د پروسس یو مرکز فعال شو او له دې وروسته به په دغه ولایت کې هغه زعفران چې په دغه ولایت کې تولیدېږي، همدلته پروسس کېږي.
دغه مرکز د ملګرو ملتونو د خوړو او کرنې د برخې له خوا جوړ شوی، چې ۴۸کیلو ګرامه زعفران په ۲۴ساعتونو کې پروسس کوي.
په دغه مرکز کې د زعفرانو د وچولو ماشینونه، د زعفرانو ډلبندي، پاکول، اضافي توکي ترې کول او د زعفرانو د بندولو چارې ترسره کېږي.
اوس مهال د هېواد په ګڼو ولایتونو کې زعفران کرل کېږي، چې له دې وړاندې یې په هرات کې هم ورته یو مرکز جوړ شوی و.
د کرنې، اوبو لګولو او مالدارۍ وزارت وايي، راتلونکي کال کې به په افغانستان کې ۲۰زره ټنه زعفران تولید شي، چې د نړۍ ګڼو هېوادونو ته به صادر شي.
د افغانستان زعفران ښه نوم او ښه کیفیت لري، چې اوس یې په نړیوالو بازارونو کې ښه نوم پیداکړی دی.