بنګله دېش کې یخنۍ ۵۰ کسان وژلي
عزم (یکشنبه، ۸ مرغومی، ١٣٩٨): بنګله دېش کې د سختې یخنۍ له امله لږترلږه ۵۰ کسان مړه شوي دي.
د رویټرز اژانس د خبر له مخې، سږ کال په بنګله دېش کې د تودوخې تر ټولو ټیټه درجه نن یکشنبه سهار په تتولیا کې ثبت شوه. نن په دې ښار کې د تودوخې درجه ۴،۵ سانټیګراډه (۴۰،۱ فارنهایټه) وه.
د حکومت د روغتیا ریاست یوې چارواکې ویلي چې د هېواد روغتونونه د یخنۍ له امله له ناروغو شویو کسانو ډک دي، چې زیاتره یې له انفلوینزا، د بدن د اوبو د کموالي او د سږو له ناروغیو ځوریږي.
حکومت ویلي چې د يخنۍ څپه ښايي څو ورځې نور هم دوام وکړي.