اشرف غني: طالبان په داسې حال کې جګړو ته دوام ورکوي؛ چې مونږ سولې ته ژمن یو
عزم دوشنبه، ۱۶چنګاښ، ۱۳۹۹):جمهور رئیس اشرف غني نن ماسپښین د سولې او بین الافغاني مذاکراتو په اړه «د سولې لپاره د اجماع پياوړتیا» تر سرلیک لاندې د سیمې هیوادونو استازو سره مشورتي غونډه کې د خپلې وینا پرمهال یوځل بیا پر طالبانو نیوکې کړې چې ګواکې خبرو ته نه حاضریږي او هیڅ راز انعطاف نه ښیي.
د ارګ خبرپاڼه وایي: په دې غونډه کې چې د ویډیو کنفرانس له لارې د سیمې د شلو هیوادونو او د ملګرو ملتونو سازمان استازو ګډون درلود، اشرف غني یې پرمهال دسیمې له هیوادونو د ګډوموخو د تعقیب غوښتنه وکړه او ټینګار یې وکړ چې ټوله هڅه یې داده تر څو یو “دیموکراتیک افغانستان”رامنځته کړي«موږ د سیاسي ژمنتیا ظرفیت لرو چې جګړه پایته ورسوو او طالبانو ته یوه سیاسي حللاره وړاندې کړو ترڅو تاوتریخوالی بس کړي»
خبرپاڼه وړاندې وایي چې« جمهوررئیس له امریکا متحدو ایالتونو څخه د افغانستان د ثابت قدمه شریک په توګه په مننې وویل، دغه هیواد له افغانستان سره یو ځای د سولې پروسه کې د نړیوالې او سیمه ییزې اجماع د پياوړتیا لپاره زیاتې هڅې کړې دي.»
د خبرپاڼې له مخې، اشرف غني د سولې د خبرو پیل خپله لاسته راوړنه وبلله او زیاته یې کړه چې د اوسني تاوتریخوالي کچه د تېر کال په پرتله لوړه ده« د اوربند وړاندیز او ټولشموله مذاکره کوونکی پلاوی مو جوړ کړ او همداراز د ملي مصالحې عالي شورا مو جوړه کړه او په دې برخه کې قوي ملي اجماع جوړه شوه»
غني ویلي چې طالب بندیان یې د خپلو بندیانو د خلاصون لپاره آزاد کړي او ټینګار یې وکړ چې مونږ سولې ته ژمن یو خو د افغان عسکرو پر وړاندې د طالبانو روانه جګړه ملي اجماع ته زیان اړوي.
اشرف غني داسې مهالدا څرګندونې کوي چې په همهاله توګه کابل حکومت په نا اعلان شوې بڼه په ولایاتو کې د طالبانو پر وړاندې عملیات توند کړي او هم یې د بندیانو د خلاصون لړۍ چې د بین الافغاني مذاکراتو پیل ته لار پرانیزي، په قصدي ډول له ځنډ او خنډ سره مخ کړې ده.