غزني کې د کابل — کندهار لویه لاره د اعتراض په توګه تړل شوې
عزم (سه شنبه ، ۳۱ چنګاښ، ۱۳۹۹): د غزني ولایت مرکز اړوند د آرزو سیمې اوسېدونکو، د کابل- کندهار لویه لار د ترافیکو په مخ تړلې او په مظاهرو یې لاس پورې کړی.
دغه مظاهره کوونکي وايي چې تېره ورځ په یاده سیمه کې د ملي اردو ځواکونو له لورې د هاوان مرمۍ ویشتلو له کبله دوه ملکیان وژل شوي او درې تنه نور ټپیان دي.
دوی وايي چې تر هغو به خپلو مظاهرو ته دوام ورکړي، څو چې له سیمې د ملي اردو اړوند پوستې تخلیه شوې او سیمه یې پرې ایښې نه وي.
د غزني ځايي چارواکو تر اوسه په دې هکله څه نه دي ویلي.
خو د سیمې اوسېدونکي وايي چې له دریو میاشتو راهیسې، له کله چې په سیمه کې پوستې جوړې شوې، خپل کورونه ورته سور اور ګرځېدلي او هره ورځ د ملي اردو له لورې د وړو او غټو اسلحو ړندې مرمۍ وريږي، چې موږ یې سخت زیانمن کړي یو.
د طالبانو ویاند ذبیح الله مجاهد هم دغه جنایت غندلی او پر خپله ټوېټر پاڼه یې لیکلي: “دغزني ولایت د مرکز اړوند ارزو سیمه کې مزدورو عسکرو دملکي خلکو کورونه په هاوان و ویشتل، چې له امله یې ۲ تنه ملکیان په شهادت و رسیدل”.
د یادونې ده چې د غزني په ډېری سیمو کې نژدې هره ورځ د حکومتي عسکرو په ډزو کې ملکیانو ته مرګ-ژوبله اوړي، خو حکومتي چارواکې په خپلو اعلامیو کې یاد کسان طالبان یادوي او یا یې پړه پر طالبانو ور اچوي.