سبا ورځ؛ د مذاکراتي ټیمونو لومړنۍ عمومي غونډه کیږي
عزم دوشنبه،۲۴، وږی، ۱۳۹۹):د طالبانو د سیاسي دفتر ویاند ډاکتر محمد نعیم وایي چې د تیرې ورځې په څیر نن ورځ هم د ماښام له لمانځه وروسته د بین الافغاني مذاکراتي ټیمونو د تماس کمیټو ناسته ترسره کړې ده.
نوموړی زیاتوي« په ناسته کې بيا هم د راتلونکو ناستو پر کاري اصولو او مهال ويش باندې خبرې وشوې.»
نن هم د ماښام له مانځه وروسته د بین الافغاني مذاکراتي ټیمونو د تماس کمیټو د پرون په څېر ناسته سره درلوده، په ناسته کې بيا هم د راتلونکو ناستو پر کاري اصولو او مهال ويش باندې خبرې وشوې.
— Dr.M.Naeem (@IeaOffice) September 14, 2020
ډاکټر نعیم وایي چې دواړو ټیمونو د عمومي غونډې د چمتوالي په اړه چې په وینا یې “سبا ته به تر سره شي” خبرې او “هوکړه” وکړه.
د کابل د مذاکراتي ټیم غړی نادر نادري هم پر خپله ټویټرپاڼه دا موضوع تائیدوي او وایي چې «نن د سولې مذاکراتو د تماس ډلې د کاري اصولو او طرزالعمل په اړه تفصیلي خبرې وکړې او د عمومي غونډې لپاره چې سبا ته به ترسره شي چمتو کړل.»
نن د سولې مذاکراتو د تماس ډلې د کاري اصولو او طرزالعمل په اړه تفصیلي خبرې وکړې او د عمومي غونډې لپاره چې سبا ته به ترسره شي چمتو کړل.
— Nader Nadery (@N_Nadery) September 14, 2020
د سولې په چارو کې د دولت وزارت هم ویلي چې نن د سولې مذاکراتو د تماس ډلې د کړنلارې او کاري اصولو په اړه سره ډېر بحث وکړ او دا کړنلاره یې د عمومي ناستې لپاره چې ټاکل شوې سبا د دواړو پلاویو ترمنځ ترسره شي، چمتو کړې ده.
د یادولو ده چې تیره ورځ هم دواړو لوريو پر همدې موضوع سره ناسته درلوده، چې کومې پایلې ته نه وه رسیدلي.
د کابل پلاوی د اوربند پر موضوع زیات ټینګار کوي، خو طالبان بیا وایي چې لومړی باید هغه ګامونه واخیستل شي چې اوربند تضمین کړای شي.
د تماس په ګروپ کې د مذاکراتي ټیمونو ټول غړي نه، بلکې څو محدود کسان شامل دي؛ چې د کابل له ټیم څخه ضرار مقبل، عنایت بلیغ،نادر نادري، محمد ناطقي او فوزیه کوفي او د طالبانو له لوري بیا مولوي عبدالکبیر، شیر محمد عباس ستانکزی،نورالله نوري،شهاب الدین دلاور او مولوي قاسم ګډون لري.
د کابل د ټیم ټول تمرکز پر اوربند ده او د طالبانو غوښتنه لا معلومه نه ده، خو دا چې دواړه خواوې پر څه توافق کوي، دا به د دوشنبې پر ورځ چې د رسمي مذاکراتو لومړۍ ورځ ده، معلومه شي.
ویل کیږي مذاکرات به د رسنیو تر څار لاندې نه وي او یواځې هغه څه به رسنیز کیږي، چې توافق پرې کیږي