لوګر کې د کرنیزو محصولاتو د ۲۲۶پروژو کارونه بشپړ شوي دي
عزم (چهارشنبه، ۲۶، وږی، ۱۳۹۹ل): د لوګر د کرنې ریاست چارواکي وايي، په دغه ولایت کې د کرنیزو محصولاتو مدیریت اړوند د ۲۲۶پروژو چارې بشپړې شوي او ګټې اخیستنې ته پارل شوي دي.
د لوګر د کرنې رئیس عبدالله تسل وايي، په دغو پروژو ۱۲۲مېلیونه افغانۍ لګښت راغلی دی.«په دغو بشپړ شویو پروژو کې د پیازو ۹۱ زېرمتونونه، د کچالو ۷۹ زېرمتونونه او ۲۸ ممیزخونې جوړول او د سبو او مېوو ۲۸ وچوونکي دستګاوې وېشل شامل دي. دغه نوي پروژې د لوګر ولایت په مرکز او ولسوالیو کې د ۱۲۲ مېلیونه افغانیو په لګښت د کرنیزو محصولاتو مدیریت د پروژې په اډانه کې پلي او ګټې اخیستنې ته وسپارل شول.»
د ده په خبره، د دغو پروژو په کارونو کې سلګونه خلکو ته کار هم پیدا شوی و او لسګونه کسان د دې پروژو د ساتنې او پرمخ بېولو لپاره په اوږدمهاله دندو وګمارل شول.
په لوګر کې ګڼ کرنیز توکي کرل کېږي، خو د عصري او سړو خونو د نشتوالي له امله کرنیز توکي نه ساتل کېږي او په کمه بیه په بازار کې پلورل کېږي.