د برېښنا د څلورو پروژو هوکړې تصویب شوې
عزم (چهارشنبه، ۰۲، تله، ۱۳۹۹ل): د مالیې وزارت د عامه خصوصي شرکتونو د پالیسۍ مشره لېمه خرم وايي، د افغانستان د اقتصاد عالي شورا په هرات، کابل او بلخ کې د بادي برېښنا او لمریزې برېښنا څلور پروژې تصویب کړي.
د خرم په خبره، په یادو پروژو ۱۶۰مېلیونه ډالر لګښت راځي.
نوموړې زیاتوي، په هرات کې د بادي برېښنا پروژه ۲۵مېګاواټه ده او بله د لمریزې برېښنا پروژه ده، چې دا هم په هرات کې پلي کېږي او ۲۵مېګاواټه برېښنا به تولیدوي.« په مزار شریف کې د ۴۰مېګاواټه لمریزې برېښنا پروژه ده او د کابل په نغلو کې د اوبو پر سر د ۲۰مېګاواټه لمریزې برېښنا تختې نصبېږي.»
دا وايي، یادې پروژې د حکومت او خصوصي سکتور ترمنځ د عامه خصوصي مشارکت یوه برخه ده.
افغان حکومت داسې مهال د برېښنا د څلورو پروژو د تصویب خبره کوي، چې تېره میاشت د افغان حکومت او اماراتي شرکت ترمنځ په هېواد کې د ۳۰۰۰مېګاواټه لمریزې برېښنا د تولید تړون لاسلیک شو.
اوسمهال افغانستان ۲۰۰۰مېګاواټه برېښنا ته اړتیا لري، خو حکومت دېره تکیه په وارداتي برېښنا کړې، چې ډېری وخت مزي پرې کېږي او په اوونیو ـ اوونیو خلک له برېښنا بېبرخې کېږي.
افغان حکومت هر کال تاجکستان، ترکمنستان، ازبکستان او ایران ته ۲۵۰مېلیونه ډالر د برېښنا کلنی لګښت ورکوي، خو په هېواد په اړینو برخو پانګونه نه کوي.
له تېرو لسو کلونو راهیسې د هېواد په ګوټ ګوټ کې خلک له لمریزې برېښنا کار اخلي، چې یوازې څراغونه پرې ښه روښانه کېدای شي او نورې ګټې ترې نهشي اخیستل کېدای.