امرالله صالح د کابل د امنیتي چارو مشري په غاړه اخلي
عزم (شنبه، ۲۶ تله، ۱۳۹۹): وروسته له هغې چې کابل کې د وژنو، ترور او اختطاف پېښې بیخي ډیرې شوې د اشرف غني لومړي مرستیال امرالله صالح وویل، چې نور د کابل امنیتي چارې دی پر مخ وړي.
نوموړي په خپله فیسبوک پاڼه لیکلي: سر له نننه د ولسمشر غني په امر د څو اونیو له پاره د کابل امنیتي چارې مستقیماً په خپله مخ ته وړم.
هغه څرګنده کړې: «د امنیت د تامین او قانون پلي کولو په برخه کې زما قاموس د مصلحت او جنایتکار د بښنې لغت نلري».
دا په داسې حال کې ده چې دې وروستیو کې د کابل اوسېدونکي شکایت کوي چې وسله والې غلاوې او شکونې زیاتې شوي او د خلکو ژوند یې تنګ کړی.
خو صالح چې له رسمي وظیفو وړاندې خپله د زورواکانو او غاصبانو په ملاتړ تورن و، بیا وايي: د غلو، قانون ماتونکو، مجرمینو او غاصبینو لېست له وړاندې جوړ شوی او په چا هم رحم نه کیږي.
باید وویل شي چې څو ورځې وړانې د ارګ مشر اشرف غني هم په امنیتي غوډه کې وویل چې د کابل په پولیسو کې به اساسي تغیرات راشي.
بل لور ته د چارو شنونکي په دې اند دي، چې امرالله صالح هیڅ نوع امنیتي او حربي تجربه نلري؛ نو کله کولی شي د یو هېواد پلازمینه چې له څو ډوله امنیتي ګواښونو سره مخ ده، په امن کړي؟
دوی وایي: صالح یو سیاسي کس دی؛ او په امنیتي برخو کې هیڅ زده کړه نلري.
تر اوسه ارګ په دې اړه څه نه دي ویلي.