ننګرهار کې د المونیمو کارخونې هره ورځ ۳زره کیلو ګرامه لوښي جوړوي
عزم(سهشنبه، ۲۷، لړم ۱۳۹۹): د ننګرهار د صنعت او سوداګرۍ خونه وايي، په جلال اباد کې د المونیمو درې کارخونې فعالیت کوي، چې هره ورځ په منځني ډول ۳زره کیلو ګرامه لوښي جوړوي او د ننګرهار سربېره یې نورو ولایتونو ته هم لېږي.
د دوی په خبره، په یادو کارخونو کې ۱۷۰ تنه کار هم کوي او هره کار خونه د ۸ زره کیلو ګرامه المونیمي لوښو جوړولو ظرفیت لري، خو د امکاناتو د نشتوالي له امله یې تولیدات کم دي.
دوی وايي، که د یادو کارخونو لپاره د برېښنا، ځمکې او خامو توکو ستونزه هواره شي، نو خپل تولیدات به ډېر کړي.
د یادو کارخونو مالکان هم وايي، چې د حکومت له لوري څو ځلې د ستونزو د هوارۍ ژمنې ورکړل شوي، خو تراوسه عملي شوي نه دي.
په ننګرهار کې د شیخ مصري په صنعتي ښارګوټي کې ګڼې کارخونې فعاله دي، چې ګڼ توکي تولیدوي او سلګونه تنه پکې په کار هم بوخت دي.