د ښایسته پېغلې او وږي پړانګ جنجالي کیسه!

استاد حامد افغان

ویل کیږي دا دومره ستره جنجالي کیسه ده چې تاریخ کې یې د سړیو او ښځو تر منځ ډېر جنجالونه رامنځته کړي دي، دا د پېغلې او پړانګ کیسه ده چې امریکايي ادیب فرانک سټوکټون لیکلې ده، کیسه د پخوا زمانې د یوه پاچا کیسه ده چې په جرم د تورنو کسانو د محاکمې او سزا لپاره یې یوه نوې او نادره طریقه ایجاد کړې وه.

دا نوې طریقه داسې وه چې په جرم تورن کس به یې د دوو تړلیو دروازو مخته ودروه، د یوې دروازې شا ته به ښایسته پېغله درول شوې وه او د بلې دروازې شا ته وږی پړانګ. تورن مجرم ته به وویل شول چې یوه دروازه خلاصه کړي، که هغه به د پېغلې دروازه خلاصه کړه، په جبري توګه به هغه پېغله ورته په نکاح کېدله او که به یې د پړانګ دروازه خلاصه کړه، نو هغه مجبوره و چې له پړانګ سره مقابله وکړي، چې طبعا دا مقابله بې د مجرم په تاوان وه. یعني د پېغلې دروازه خلاصول دا مطلب چې سړی پاک او بې ګناه دی او د پړانګ دروازه حلاصول دا مطلب چې سړی ګناهګار دی او سزا یې دا ده چې پړانګ یې وخوري.

په دې توګه کیسه روانه وه، جنجال هغه مهال رامنځته شو چې د پاچا لور د ولس په یوه عادي ځوان مینه شوه او هغه هم پرې مین شو، لنډه به یې وایو یوه ورځ دواړه د پاچا له خوا په نامناسب … حالت کې ونیول شول، څرنګه چې ځوان د عام ولس وګړی و، نو پاچا د پېغلې او پړانګ په طریقه محاکمې ته حاضر کړ.

د محاکمې وخت راغی، متهم ځوان د راټولو شویو خلکو په منځ کې یو بل لور ته کتل، چې په یوه دنګه ماڼۍ کې یې د پاچا لور (خپله محبوبه) ولیدله، چې ده ته یې کتل، هغه داسې ځای ناسته وه چې په اساني سره یې د دواړو دروازو شاوې لیدلې او دا یې هم لیدل چې د کومې دروازې شا ته پړانګ او د کومې شا ته پېغله ولاړه ده.

خلکو ځوان ته کتل او ځوان په پټه خپله محبوبه څارله، په وروستي ځل یې چې ورته وکتل , هغې دوو دروازو کې یوې ته اشاره ورته وکړه، چې له ده پرته بل هیچا ته پته ونه لګیدله، دلته ځوان په ژور سوچ کې ډوب شو، دی باوري و چې هغه مینه ورسره لري او د ده خلاصون غواړي؛ نو ناشونې ده چې د پړانګ دروازې ته به یې اشاره ورته کړې یي. خو بل لور ته د پاچا لور طبعاً غیرتمنه او کبرجنه ده، نو ایا شونې ده هغې دروازې ته به یې اشاره کړې یي چې شا ته یې ښایسته پېغله ولاړه ده! چې دی به په اجباري توګه هغې سره واده کوي.

ایا د پاچا د لور او د ځوان د محبوبې به د غیرت او تکبر هیجان غالب شوی وي او د پړانګ دروازې ته به یې نغوته او اشاره کړې یي او که مینه او عاطفه به یې برلاسې شوې یي او هغې دروازې ته به یې نغوته کړې یي چې ښا ته یې ښایسته پېغله ولاړه وه؟ ایا ځوان به د خپلې محبوبې خبره منلې وي او کنه د هغې د نغوتې پر خلاف به یې ګام پورته کړي وي؟

لنډه دا چې اخیر ځوان پرېکړه وکړه هغه دروازه خلاصه کړي چې معشوقې یې نغوته ورته وکړه. دلته د کیسې لیکوال سټوکټون دریږي او وايي : زه تاسف کوم چې نه شم کولی د پایلې توقع وکړم او نه پوهیږم له دروازې څه شی راووت، ایا پېغله راووتله او که پړانګ؟! او کیسه ختمه شوه.

لکه پیل کې مو وویل دې کیسې د لوستوالو تر منځ لوی جنجال رامنځته کړ، د کیسې په اړه نارینه او ښځینه سره واوښتل، ښځو ویل چې ښځې هر وخت د نارینه لپاره قرباني ورکوي، غالبا د پاچا لور به خپل مین ته د پېغلې دروازې ته اشاره کړې وي ، نه د پړانګ دروازې ته. هغې به دا قرباني ورکړې وي چې دا دې نیمه خوا او نامراده پاتې شي خو چې مین یې روغ او ژوندی پاتي شي.

او سړیو لوستوالو وویل چې دا د ښځې طبیعت دی چې غواړي که محبوب یې له لاسه وځي او د بل چا لاس ته ورځي، له هغه دا ښه ده چې پړانګ یې ټوټه ټوټه کړي. نو غالبا هغې به د پړانګ دروازې ته نغوته کړې وي. کیسه خو هسې هم د کار په ځای کې ناپوره پاتې شوه اوس دا ووایه چې ستا څه نظر دی، ایا د پاچا لور به د پړانګ دروازې ته اشاره کړې وي او که د پېغلې؟

 

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
Close
Close
%d bloggers like this: