پنټاګون: له افغانستانه د ځواکونو د را ایستلو لړۍ نه ده ټکنۍ شوې او په ښه توګه روانه ده
عزم(سه شنبه،۲۳ مرغومی ۱۳۹۹): په داسې حال کې چې د ټرمپ او کانګریس ترمنځ سختې ناندرۍ روانې دي او په عین حال کې د امریکا کانګریس “ولسي جرګې” د یوه قانون په تصویب سره خبرداری ورکړی چې له افغانستانه باید ژر امریکایي عسکر ونه ایستل شي؛ تازه د امریکا دفاع وزارت “پنټاګون” ویلي چې د دوی لخوا د ځواکونو د را ایستلو لړۍ د معمول مطابق روانه ده او واشنګټن کې روانو سیاسي کشمکشونو پرې هیڅ راز سیوری نه دی غوړولی.
رویټرز آژانس د پنټاګون د چارواکو له قوله خبر ورکړی دی چې، امریکا به افغانستان کې د روانې “جنوري” میاشتې تر ۱۵مې نیټې پورې د ځواکونو شمیر ۲۵۰۰ته راښکته کړي او دا بهیر ښه پرمخ ځي.
پنټاګون ویلي: «تر دې مهاله هیڅ مکتوب چې له افغانستانه د ۲۵۰۰ ځواکونو د را ایستلو لړۍ ټکنۍ کړي، نه دی صادر شوی او د وتلو لړۍ د پخوا په څیر په نورمال ډول روانه ده. دا مهال افغانستان کې د امریکایي ځواکونو شمیر ۳۰۰۰تنو ته راښکته شوی او راتلونکو ورځو کې به پاتې ۵۰۰هم را وایستل شي»
که څه هم د امریکا کانګریس څو اونۍ وړاندې له افغانستانه د عسکرو د راوتلو پر بهیر نیوکه وکړه او د یوه قانون د تصویب له مخې یې ددې بهیر په ځنډولو ټینګار وکړ، خو یوه امریکایي چارواکي بیا رویټرز ته ویلي چې دا لړۍ د یاد قانون د تصویب پر مهال هم روانه وه او اوس هم داسې څه نشته چې کوم ځانګړي تغییرات په کې راشي.
نوموړي دا رد نه کړه چې ښایي یاد قانون د جوبایډن له واک ته رسیدلو پورې دا لړۍ ځنډنۍ کړي خو تاکید یې وکړ چې د ځواکونو د را ایستلو پروسه به د نوي ولسمشر د واک پرمهال لا ګړندۍ شي.
امریکا داسې مهال له افغانستانه د ځواکونو پر را ایستلو ټینګار کوي، چې وړمه ورځ اشرف غني له سي این این سره مرکه کې یوځل بیا د بهرنیوځواکونو پر وتلو اندیښنه په ډاګه کړه او ویې ویل چې دا بهیر باید ددوی په سلا او ځمکنیو واقعیتونو مخته یووړل شي.
اشرف غني د تیر په څیر بیا هم افغان عسکر د امریکا د امنیت د خوندیتوب ساتونکي وبلل او زیاته یې کړه چې دده په واکمنۍ کې که څه هم په لسګونو زره افغانانو ژوند بایللی، خو یواځې ۹۸بهرنیان وژل شوي دي