غلامي کول وجدان له خلکو اخلي
طمع طمع وس او توان له خلکو اخلي

څه کانې کوي  په  رندو انسانانو
دا ډالر دي چې ايمان له خلکو اخلي

د غربيانو پيسې مفتې نه هضميږي
يو په لسه يې تاوان له خلکو اخلي

د مخ غوښې پر هډوکو نه پاتيږي
سوال همدغسې پيمان له خلکو اخلي

عزت درومـي د لاسونو په لپه کې
د غيرت نوم او نښان له خلکو اخلي

د باطل مهر يې خوله ژبه کړي بنده
په ليدلو دوه چشمان له خلکو اخلي

حريت  په  غريبۍ کې  هم دولت دی
مسکنت  يو  امتحان  د خلکو  اخلي

که عزت غواړې په خپلو مټو زور کړه
خپلواکې خپلواک ځوانان د خلکو اخلي

د ضعيف پرتله  کلکه  تجربه  ده
غرب په دې توګه سران د خلکو اخلي