کابل کې د اوبو ۱۳کوچني بندونه جوړېږي
عزم(چهارشنبه، ۲۴، مرغومی ۱۳۹۹): د اوبو د چارو د تنظیم ملي اداره وايي، په کابل کې یې د ۱۳چکډمونو د جوړولو هوکړه لاسلیک کړې ده او ډېر ژر به یې چارې پیل شي.
د یادې ادارې تخنیکي مرستیال احمد ویس بصیري وايي، په دغه پروژو کې د اوبو مدیریت، د ځمکې لاندې د اوبو پیاوړتیا، د سېلابونو مهارولو په موخه ۱۳چکډمونه د کابل په شکر دره، پغمان او استالف ولسوالیو کې جوړېږي.
د بصیري په خبره، د اوبو د ښه مدیریت، د اقلیمي بدلون، د ځمکې لاندې د اوبو پیاوړتیا او د سېلابونو د مخنیوي لپاره دغه پروژې اړینې دي. «د اوبو مدیریت، د سېلابونو کنټرول، څارویو او چاپېریال ساتنې ته د اوبو برابرولو په برخه کې د چکډم ساختمانونو جوړول له یو ځانګړي ارزښت څخه برخمن دي او د اوبو د چارو د تنظیم ملي اداره په پام کې لري چې د ټول هېواد پر کچه د چکډم پروژې تطبیق کړي.»
دی وايي، په یوې داسې طرحه هم کار روان دی، چې د کابل ښار لپاره د څښاک پاکې اوبه برابرې شي او ټولو خلکو ته پاکې اوبه ورسېږي.
د اوبو چارو د تنظیم ملي اداره وايي، غواړي د هېواد په ۳۴ولایتونو او ټولو ولسوالیو کې د اوبو د مدیریت لویې، منځنۍ او کوچنۍ پروژې پلي کړي او زرګونه خلکو ته د څښاک اوبه برابرې کړي.
د کابل په ګډون د هېواد د ټولو لویو ښارونو اوبه پاکې نه دي، چې له امله یې خلکو ته ګڼې ناروغۍ هم پیداکېږي.