شنې خونې؛ هلمند د سبو له اړخه پر ځان بسیا کوي
عزم(چهارشنبه،۰۱، سلواغه ۱۳۹۹): د هلمند د کرنې ریاست وايي، په دغه ولایت کې د نورو کرنیزو توکو سربېره په پراخه کچه سابه هم کرل کېږي، چې د شنو خونو له پلوه دغه ولایت پر ځان بسیا کوي.
د هلمند د کرنې رییس زلمی الکو وايي، هلمند په سوېل کې د تودې هوا لرونکی دی، چې د سبو له مخې ډېر مشهور دی او د شنو خونو د جوړېدو له بركته اوس بزګران د ژمي او د کال په ټولو موسمونو کې هم کولی شي، چې په خپلو شنوخونو کې د سبو او ترکاریو کرکېله وکړي او د دې ولایت د اړتیا پوره کولو ترڅنګ یې نورو ګاونډو ولایتونو ته هم صادرې کړي.
د الکو په خبره، د مرکز لښکرګاه په ګډون په ناوې، نادعلي او نهر سراج ولسوالیو کې یې د بزګرانو لپاره ۱۶۶شنې خونې جوړې کړي، چې ورسره د سبو کرکېله هم ډېره شوې ده. «تېر وخت به یې یوازې د ګرمۍ موسم کې سابه په بازارونو کې موندل، اوس یې د کال هر فصل کې خوړلی شي.»
دی وايي، د شنو خونو له برکته اوس د هلمند اوسېدونکي د رومي بانجانو او بادرنګو له کمښت سره نه مخ کېږي او د کال په ټولو فصلونو کې یې ترلاسه کولی شي.
نوموړی زیاتوي، په تېرو کلونو کې د ژمي په موسم کې سابه له بهره واردېدل، خو اوس د شنو خونو له برکته بهرني سابه نه واردېږي.
د کرنې وزارت د معلوماتو له مخې، د کرنې پرمختیايي پروژې له لارې یې د هېواد په ګوټ ګوټ کې زرګونه شنې خونې جوړې کړي، چې بزګران پکې سابه او ترکاري کري او په ښه بیه یې پلوري.