کرېکټ: د پاکستان سوپر لیګ نن د شپږو افغان لوبغاړو په شتون کې پیلېږي

عزم(شنبه، ۰۲، کب ۱۳۹۹): ټاکل شوې نن ماښام د پاکستان سوپر لیګ د شپږو افغان لوبغاړو په شتون کې پیل شي.

د پاکستان سوپر لیګ(PSL) پرې خپلې فېسبوکپاڼې لیکلي، چې لومړۍ لوبه د کراچي کینګز او کوټه ګلډیټرز ترمنځ په کراچۍ پیلېږي، چې د فبروري له ۲۰نه به د مارچ تر ۲۲مې روان وي.

د پاکستان د سوپرلیګ د شپږم پړاو ټولې سیالۍ دا ځل په پاکستان کې کېږي، چې د بېلابېلو لوبډلو له لوري ځينې افغان لوبغاړي هم اخیستل شوي دي.

محمد نبي عیسیٰ خېل او نور احمد لکڼوال د کراچي کینګز، راشد خان د لاهور قلندرز، مجیب الرحمن او وقارسلام‌خېل د پېښور زلمي او قیس احمد بیا د کوټه ګلډیټرز له لوري اخیستل شوي دي.

سږکال ګڼو افغان لوبغاړو د پاکستان سوداګریز لیګ ته نوم‌لیکنه کړې وه، خو د دوی له منځه یوازې پنځه لوبغاړي په بولۍ کې واخیستل شول او وقارسلام‌خېل پرون د پېښور زلمي لوبډلو له لوري واخیستل شو.

د پېښور زلمي لوبډلې ویلي، وقار سلام‌خېل یې د سویلي افریقا د کیڼ لاسي توپوهونکي ډېویډ مېلر پر ځای په لوبډله کې اخیستی دی.

د پاکستان د کرېکټ بورډ ادارې ویلي، سږنۍ ټولې لوبې په لاهور او کراچۍ کې ترسره کېږي او د سږ کال یې د نورو کلونو په پرتله تکړه لوبغاړي هم ورته اخیستي دي.

په سږني پي اېس اېل کې د اسلام اباد یونایټېډ، ملتان سلطانز، لاهور قلندرز، پېښور زلمي، کوټه ګلډیټرز او کراچي کېنګز هغه شپږ لوبډلې دي، چې په دې لیګ به ولوبېږي.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
%d bloggers like this: