د روانې کب میاشتې په ۱۵مه په دولتي او خصوصي پوهنتونونو کې درسونه بیا پیلېږي
عزم(سه شنبه، ۰۵، کب ۱۳۹۹): د افغانستان د لوړو زده کړو وزارت وايي، د روانې کب میاشتې په ۱۵مه به په ټولو دولتي او خصوصي پوهنتونونو کې په حضوري ډول درسونه پیل شي.
له یاد وزارت څخه په خپره شوې خبرپاڼه کې ویل شوي، د ۱۴۰۰ کال د وري تر ۱۵مې نېټې به د څلورو اوونیو لپاره درسونه ورکړل شي.«د افغانستان کابینې د ۲۶/۸/۱۳۹۹ نېټې ۲۵ شمېرې او د لوړو زده کړو وزارت مشرتابه د ۲/۱۲/۱۳۹۹ نېټې پرېکړو پر بنسټ، د ټولو دولتي او خصوصي پوهنتونونو حضوري درسونه د روان کال کب میاشتې په ۱۵مه نېټه په رسمي توګه پیلېږي. دولتي او خصوصي پوهنتونونه او د لوړو زده کړو موسسې اړ دي څو د کب میاشتې له ۱۵مې د ۱۴۰۰ کال د وري تر ۱۵مې نېټې د څلورو اوونیو په لړ کې درسونه په تشدیدي توګه مخته یوسي او د لاندې اکاډمیک مهالوېش پر بنسټ د ۱۳۹۹ کال د مني سمسټر پاتې درسونه وړاندې کړي.»
د خبرپاڼې له مخې، د روانې کب میاشتې په ۱۵مه د پوهنتونونو درسونه پیلېږي او د ۱۴۰۰کال د وري په ۱۵مه به ازموینې اخیستل کېږي.
پر کابل پوهنتون له برید وروسته د لوړو زده کړو وزارت په هېواد کې ټول دولتي او خصوصي پوهنتونونه رخصت کړل؛ خو اوس یې پرېکړه کړې چې د روانې کب میاشتې په ۱۵مه به بېرته په پوهنتونونو کې په حضوري ډول درسونه پیل شي.