امریکا کابل ته د زلمي خلیلزاد سفر اغیزناک بللی
عزم(پنجشنبه، ۱۴ کب ۱۳۹۹): د امریکا د بهرنیو چارو وزارت ویاند نډ پرایس په یوه خبري غونډه کې ویلي چې کابل ته د خلیلزاد درې ورځنی سفر اغیزناک وو.
هغه د خلیلزاد د سفر جزئیات نه دي ورکړي، خو په افغان رسنیو کې د ځینو سرچینو په حواله داسې یو خبر ګرزي چې نوموړي یوه لس مخیزه کاپي له افغان سیاسیونو سره د راتلونکي حکومت د جوړښت په اړه شریکه کړې چې له ارګ پرته اکثره سیاسیونو ورسره توافق هم ښودلی.
په ورته وخت کې کابل کې د امریکا سفارت هم ویلي چې خلیلزاد د خورا مهمو مسایلو او سولې په اړه له افغان چارواکو، سیاسیونو او مدني فعالینو سره خبرې کړې دي.
د خلیلزاد د جوبایډن له نوې دورې وروسته دا لومړی سفر دی چې له جرمني یې پیل کړی او قطر ته به هم ځي تر څو هلته له طالبانو سره هم خبرې وکړي.