بادغیس: په هوایي برید کې ویجاړ شوی ‘مهم پُل’ د طالبانو لخوا بیرته رغول شوی
عزم(دوشنبه۹، وری۱۴۰۰):طالبان وایي د بادغیس ولایت په مرغاب ولسوالۍ کې یې هغه مهم پُل بیرته رغولی چې د دولتي الوتکو لخوا ویجاړ شوی وه.
دغه ستر او مهم پُل چې د یادې ولسوالۍ په حلقوي سړک کې پروت ده، یو له هغو مهمو پلونو څخه ده چې د هیواد جنوبي او شمالي ولایتونه سره نښلوي.
خبرپاڼه وایي چې یاد پُل تیرکال د افغان هوایي ځواکونو لخوا بمبار شو، چې ورسره خلک له سختو ستونزو سره لاس او ګریوان او آن دې ته اړ ایستل شول چې په اوبو کې د کښتیو په مټ پورې وځي، چې یاد کښتۍ هم څوځله د دولت پلوه ملیشو لخوا هدف وګرځیدې او ګڼو هیوادوالو ته په کې مرګ ژوبله واوښته.
طالبان وایي، وروسته تر هغه چې ددولتي ځواکونو محاصره کنډک له سیمې ووت، نو دوی د ولسي خلکو په همکاري د یاد مهم پل د ترمیم او جوړولو کار پیل کړ چې د لنډي مودې وروسته یې اوس د رغیدلو کار پای ته ورسید او ترمیم شو.
دیادولو وړ ده چې دنوموړي پُل په جوړ ولو سره به په مواصلاتي برخه کې د ولسي خلقو ګڼ شمېر مشکلات حل شي.
په داسې حال کې چې دولت پلوې رسنیزې کړۍ تل پر طالبانو د رغنیزو چارو د ویجاړۍ پړه ور اړوي، خو ښکاري چې په عملي ډګر کې طالبان تر نورو زیات د یادو پروژو ساتنې او تقویې ته ژمن دي او لا هڅه کوي چې تر واک لاندې سیمو کې یې رغنیزې پروژې را جلب او عملي شي.