جیف بیزوس د نړۍ تر ټولو شتمن شخص دی؛ ۹ نور یې هم وپېژنئ
عزم (دوشنبه، ۲۲وری، ۱۴۰۰): د شتمنیو او مالدارۍ په اړه معلومات خپرونکې امریکايي فوربز خپرونې تازه د نړۍ د لسو شتمنو کسانو لېست خپور کړی دی.
په یاد لېست کې امریکا د نړۍ هغه لومړی هېواد ګڼل شوی چې تر ټولو زیات بیلونران لري؛ چې ورپسې چین او جرمني دي.
که د لویو ښارونو خبره وشي؛ نو د چین په بیجنک کې د نړۍ تر ټولو زیات بیلونران اوسیږي؛ وړاندې دغه مقام د امریکا له نیویارک سره و، چې اوس په دوهم مقام دی.
د فوربز خپرونې د معلوماتو پر اساس: سږ کال د امازون شرکت مشر جیف بیزوس د نړۍ ټر ټولو شتمن کس دی، چې ټوله شتمني یې شاوخوا ۱۷۷ بیلیونه اټکل شوې. ویل کیږي، چې د کرونا پر مهال د هغه په شتمني کې تر بل هر چا زیات پراخوالی او ډېروالی راغلی دی.
له جیف بیزوس وروسته د ټیسلا شرکت مشر ایلون مسک دی، چې شاوخوا ۱۵۱ بیلیونه شتمني لري.
بیرنارډ اماولټ او د هغه کورنۍ د ۱۵۰ بیلیونو په لرلو سره دریم ځای لري.
د مایکروسافټ شرکت مشر او نړیوالې ټولنې، روغتیايي موسسو او غریبو هېوادونو سره د روغتېا په برخه کې زیاته مرسته کوونکی بیل ګېټس ۱۲۴ بیلیونه شتمني لري، چې څلورم مقام یې خپل کړی.
د فیسبوک د جوړونکي مارک زوکربرګ ټوله شتمني ۹۷ بیلیونه ده او ۵ مقام لري.
تر هغه وروسته وارین بیفیټ دی، چې ۹۶ بیلیونه شتمني لري.
لیري ایلسون په دغه لېست کې د ۹۳ بیلیونو په لرلو سره ۷ ځای لري.
د ګوګل کمپنۍ مرستیال مشر لیري پیج بیا ۹۱ بیلیونه شتمني لري او د نړۍ ۸ مالداره شخص دی.
له لیري پيج وروسته د ګوګل کمپنۍ یو بل مشر سیرجي برین دی چې شتمني یې ۸۹ بیلیونه اټکل شوې.
د هندوستان مشهور شتمن مکېش امباني په دغه لېست کې ۱۰ ځای لري. د امباني ټوله شتمني ۸۴.۵ بیلیونه اټکل شوې. نوموړی په جنوبي اسیا کې د نړۍ تر ټولو شتمن وګړی پېژندل شوی، چې لسګونه شرکتونه او فابریکې لري.
په ورته وخت کې فوربز خپرونې ویلي، چې د کرونا پر مهال د بیلونرانو په شتمني کې بیلیونونه زیاتوالی راغلی دی او کوم منفي اثر یې پرې نه دی کړی.