«په هېواد کې د سټروسو د تولید کچه ۱۳زره ټنو ته رسېدلې ده»
عزم(یکشنبه، ۲۹، وری ۱۴۰۰): د کرنې وزارت وايي، د نورو کلونو په پرتله پرو سږکال په هېواد کې د سټروسو د تولید په کچه کې زیاتوالی راغلی و.
د یاد وزارت د احصایې او معلوماتو ریاست وايي، په ۱۳۹۹یم کال کې د هېواد په کچه ۱۳ زره او ۲۴۳ مټریک ټنه سټروس، چې پکې کینو، مالټې، نارنج او لیمو شامل دي تولید شوي دي.
«ننګرهار د اووه زره ټنه کینو، مالټې، نارنج او لیمو په تولید سره، د سټروسو تولیدوونکو ولایتونو د نوم لړ په سرکې دی. د ننګرهار په نږدې یوزرو ۵۲ هکټاره ځمکه د سټروسو بڼونه جوړ شوي دي. د نارنجو د تولید په برخه کې بیا کونړ له نورو ولایتونو مخکې دی. تېرکال له دې ولایت څخه ۲۰۰۲ مټریک ټنه نارنج تر لاسه شوي وو. د کونړ په ۲۸۶ هکټاره ځمکه د نارنجو بڼونه جوړ شوي دي. په هېواد کې د سټروسو د تولید له اړخه لغمان او خوست هم درېیم او څلور ځای لري.»
د احصایې او معلوماتو ریاست له لوري په خپره شوې خبرپاڼه کې ویل شوي، په وروستیو کلونو کې د کابل، تخار، بلخ او سرپل په ولایتونو کې هم د سټروسو ونو د نیالګیو اېښودل او پالل دود شوي دي. «د هېواد په کچه په ټولیزه توګه په یوزرو ۹۵۲ هکټاره ځمکه د سټروسو بڼونه جوړ شوي دي، چې له دې ډلې ۶۱ هکټاره یې د کینو او مالټې بڼونه، ۴۱۵ د نارنجو بڼونه او ۴۴۹ هکټاره یې د لیمو بڼونه دي. همدارنګه د روان کال په ترڅ کې د کرنې وزارت له خوا په یوشمېر ولایتونو کې د سټروسو بڼونه جوړ شوي دي.»
که څه هم اوسمهال په ننګرهار، کونړ، لغمان او خوست ولایتونو کې د سټروسو ګڼ بڼونه جوړ شوي؛ خو هېواد ته لا هم ټنونه لیمو، نارنج، مالټې او کینو له نورو هېوادونو واردېږي.