د کورنیو چارو وزارت مشرتابه د پخواني باچا د زوی د فاتحې په مراسمو کې ګډون وکړ
عزم(دوشنبه، د تلې لسمه، ۱۴۰۲): کورنیو چارو وزارت په یوه خبر کې ویلي چې ددې وزارت ځیني لوړپوړي غړي د پخواني باچا محمدظاهر شاه د زوی شهزاده میرویس کور ته ورغلي او هغه ته یې د بښنې دعا کړې ده.
د فاتحې په یادو مراسمو کې د کورنیو چارو وزارت د پالیسۍ او ستراتیژۍ معین مولوي مخدوم عبدالحق، د مقام د دفتر لوی رئیس مولوي زین الله عابر او د یاد وزارت ویاند مفتي عبدالمتین قانع ګډون کړی وو.
چارواکو د شهزاده میرویس د کورنیو غړو ته ډاډګیرنه ورکړه او د یاد وزارت د مشرتابه د خواخوږۍ او تسلیت مراتب یې ورته وړاندې کړل.
یاده کوو چې د ظاهر باچا زوی شهزاده میرویس درې ورځې وړاندې په کابل کې ومړ. دده په مړینه ګڼو افغان لیکوالانو، فرهنګیانو او سیاسيونو خپله غمرازې څرګنده کړې وه.