د قطر خارجه وزیر: د نړیوالو غبرګون د غزې په هکله د شرم وړ دی
عزم(یکشنبه، لړم ۱۴مه، ۱۴۰۲): د قطر خارجه وزیر نن یکشنبه د خپل فرانسوي سیال کاترین کولونا سره په دوحه کې ګډ خبري کنفرانس درلود. محمد بن عبدالرحمن آل ثاني په خپل وینا کې وویل:” په غزه کې د اسراییلو بمباري د منلو نه ده او په وړاندې یې د نړیوالو غبرګون د تاسف او شرم وړ دی. هغه زیاته کړه چې د خپل فرانسوي سیال سره یې د بندیانو د خلاصون پر څرنګوالي او د بشري مرستو په هکله یې خبرې کړي.”
همداراز د فرانسې خارجه وزیر هم په خپل وار سره وویل: “فرانسې د اوربند په ګټه رایه ورکړې ده او امنیت شورا باید خپل مسؤلیت په غاړه واخلي. باید انساني حقوقو ته درناوی وشي. د ولسي وګړو څخه ساتنه وشي او د غزې د خلکو د درد او غم کمولو لپاره کار وشي. موږ غزې ته د مرستو رسولو حمایت کوو. د قطرې چارواکو سره مو د اړینو مرستو پر رسولو بحث او مجلس درلود.”
له هغه وروسته چې حماس یو شمېر اسراییلیان اسیران کړل، د ځینو هیوادونو دوه تابعیته وګړي هم د اسیرانو په لیست کې شامل دي. چې پکې یو شمیر فرانسویان هم دي. د فرانسې خارجه وزیر هڅه کوي، قطر وهڅوي چې حماس تر فشار لاندې راولي تر څو فرانسوي اسیران ازاد کړي.