طالبان وایي د شمشاد برید دوی پورې اړه نلري، خو داعش یې پړه ومنله
عزم ټکی اورګ(سه شنبه ، ۱۶ لړم ، ۱۳۹۶)
نن سهار په ځایي وخت یوولس بجې شاوخوا د شمشاد تلویزون پر ودانۍ وسلوال برید وشو چې له امله یې د دغه تلویزون خپرونې و ځنډېدلي او مرګ ژوبله یې هم واړوله.
د مرګ ژوبلې په اړه د کورنیو چارو وزارت ویاند نجیب دانش ویلي چې په برید کې دوه تنه وژل شوي دي او شل تنه ټپیان دي.
د پیښې ځای ته تر اوسه څوک نه پریښودل کیږي او سیمه د حکومتي ځواکونو له لوري کلا بنده ده شاید د ټپیانو او مړو شمیره لوړه شي.
ځینې ټپیان ځایي روغتونو ته وړل شوي دي او هغوی هم وایي چې وسلوالو ودانی ته له داخلیدلو سره پیوست دوه ساتونکي و وژل او د ټپیانو پوره معلومات نشته.
دطالبانو ویاند ذبیح الله مجاهد د برید په لومړي وخت کې و ویل چې دوی پورې اړه نلري خو داعش وسلوالو یې پړه ومنله او برید یې په غاړه واخیستلو.
د یادونې وړ دی چې طالبانو د طلوع او یک تلویزونونو ته د کندز د سقوط په وخت هغه مهال اخطار ورکړو چې په دغې ډلې یې ناسم تورونه ولګول خو د شمشاد تلویزیون په اړه یې تر مخه هم کومه اخطاریزه اعلامیه څه نه وو خپاره کړي.