د لغمان ښاروالۍ په مرکز مهترلام کې یو شمېر پراختیايي پروژې پلي کوي
عزم(یکشنبه، ۱۷مه، ۱۴۰۲): د لغمان ښاروالۍ له لوري د دغه ښار په بېلابېلو سیمو کې د ۳ میلیونو او ٦٠٠ زره افغانیو په لګښت د پنځو پراختيايي پروژو د بنسټ ډبرې کېښودل شوې.
د دغو پروژو د پیل په مراسمو کې د لغمان والي قاري زین العابدین عابد وویل چې په یادو پروژو ۳ میلیونه او ۶٠٠ زره افغانۍ لګښت راځي. د ښآغلي عابد په وینا چې په دې شمېر پراختیايي پروژوکي د موټرو تم ځای، پلچکونه، پلې لارې، د ویالو سنګ کاري او د فاتحه خوانۍ خونې او یو شمير نوري د بیا رغونې چارې پکې شاملې دي.
د والي په وینا چې د دې پروژو کارونه به د پینځو میاشتو په موده کې بشپړ شي چې ۲۵۰ کاریګرو ته به پکې د کار زمینه هم برابره شي.
قاري عابد د پروژې له تطبیق کوونکي شرکت او مهترلام ښاروالۍ ته سپارښتنې وکړې چې د پروژې په پلې کولو کې پوره دقت وکړي او پر وخت یې کارونه بشپړ کړي.
ورته مهال د مهترلام ښاروال مولوي رحمت الله شهامت وویل چې د دې پروژو بشپړتیا به تر نیم کال لږ وخت ونیسي او نږدې تر دووه سوو ډېرو وزګارو کارګرو ته به پکې د کار زمینه هم برابره شي.
شهامت زیاته کړه، چې د دغو پروژو سربېره مهترلام ښاروالۍ په پام کې لري دې ته ورته نورې پروژې هم پلې کړي.