د روسیې ولسمشر «ولادیمیر پوتین» قزاقستان ته تللی
عزم: (پنجشنبې، د لړم۱۸مه، ۱۴۰۲)؛ روسي رسنۍ راپور ورکړی چې ولسمشر، ولادیمیر پوتین نن (پنجشنبه د نومبر ۹مه) قزاقستان ته تللی دی.
د تاس خبري آژانس د خبر له مخې، ښاغلی پوتین به د دې سفر په ترڅ کې د قزاقستان له ولسمشر، قاسم جومارت توکایف سره پر بېلابېلو مسایلو خبرې وکړي.
ټاکل شوې پوتین او توکایف د منځنۍ اسیا – روسیې په فارمټ او د «کرنه د پياوړي اقتصاد بنسټ دی» په نامه د سیمهییزو همکاریو په ۱۹مه عمومي غونډه کې ګډون وکړي.
دا په روان کال کې د روسیې او قزاقستان د ولسمشرانو ترمنځ پنځمه لیدنه ده چې پر بېلابېلو موضوعاتو سره خبرې اترې کوي.
ولادیمیر پوتین داسې مهال له خپل هېواده بهر سفرونه کوي چې د جرمونو د نړیوالې محکمې لخوا پرې بندیز هم لګېدلی دی.