د خوړو نړیوال پروګرام: د بېوزلو د لاسنیوي لپاره ۴۰۰ میلیونه ډالر پکار دي
عزم: (یکشنبې، د لړم ۲۱مه، ۱۴۰۲)؛ د خوړو نړیوال پروګرام (WFP) په روان ژمي کې له بېوزلو افغانانو سره د مرستې لپاره د ۴۰۰ میلیونه ډالرو غوښتنه کړې ده. (WFP) نن (یکشنبه د لړم ۲۱مه) پر اېکس پاڼه لیکلي چې روان ژمي ته څو اوونۍ پاتې دي او دوی باید د افغانستان لرو پرتو سیمو ته پر وخت مرستې ورسوي. دې ادارې ویلي، که لرو پرتو سیمو ته پر وخت د خوراکي توکو مرستې ونه رسول شي، ښايي په نږدې ورځو کې لارې د واورې له امله وتړل شي. د خوړو نړیوال پروګرام ویلي: “څلورسوه میلونه ډالرو ته اړتیا ده، څو په روان ژمي کې لرو پرتو سیمو ته پر وخت مرستې ورسول شي او د اړمنو لاسنیوی وشي.” دې نړیوالې ادارې همداراز هېواد ته د راستنېدونکو افغانانو پر وضعیت اندېښنه ښودلې او ویلي یې دي، اوسمهال په افغانستان کې نږدې ۱۵ میلیونه کسان بېړنیو مرستو ته اړتیا لري. د دوی په وینا، له پاکستان او نورو ګاونډیو هېوادونو راستنېدونکي کسان به تر اوږدې مودې له ګڼو شدیدو ستونزو سره مخ وي.