هلمند:موسی کلا کې اوولس پوليس وژل شوي
لښکرګاه(عزم : شنبه، غبرګولي ۲۳مه، ۱۳۹۴ل)
د هلمند ولايت په موسی کلا ولسوالۍ کې د وسله والو طالبانو او پوليسو تر منځ په نښته کې لږ ترلږه اوولس پوليس وژل شوي دي.
د موسی کلا ولسوالۍ امينه قومندان محمد عيسی رسنيو ته ويلي دي چې تېره شپه په يادې ولسوالۍ کې د پوليسو او وسله والو طالبانو تر منځ نښته وشوه چې په نتيجه کې يې ۱۷ تنه پوليس وژل شوي دي او ۳ نور ټپيان دي.
محمد عيسی زياته کړه چې طالبانو د پوليسو درې رينجر موټر سوځولي او دوه نوريې له مهماتو ډک له ځان سره بېولي دي.
محمد عيسی دا هم وويل چې د طالبانو ددغه بريد په شاتمبولو له پاره مو له نږدې پوستو مرسته وغوښته خو هغوی زموږ مرستې ته رانغلل.
ديادونې وړ ده چې تېره شپه هم په ياده ولسوالۍ کې د طالبانو او پوليسو تر منځ په نښته کې پنځلس پوليس وژل شوي او پنځلس نور طالبانو ژوندي له ځان سره بيولی.
په دې وروستيو کې دطالبانو د پسرلينو عملياتو له پيل کولو سره د هيواد په بېلا بېلو سيموکې ناامني زياته شوې او ګڼ شمېر ولسوالۍ د سقوط له ګواښ سره مخ دي.
ديادې پېښې په اړه تر اوسه طالبانو څه نه دي ويلي.
عبداللطيف نظيف