کابلوف: ملګري ملتونه د افغانستان په اړه د ځانګړو استازو دویمه غونډه ترسره کوي
عزم(سه شنبه، لړم۲۳مه، ۱۴۰۲): د روسیې د ولسمشر استازی ضمیر کابلوف د دوشنبې په ورځ ټاس خبري اژانس ته په خپلو خبرو کې ویلي چې تمه ده، ملګري ملتونه په نږدې راتلونکي کې د افغانستان په اړه د ځانکړو هیوادونو استازو په ګډون یوه غونډه دایره کړي.
کابلوف زیاتوي چې دوی د افغانستان په اړه د ډېرو نړیوالو پلانونو د جوړولو په حال کې دي.
ښاغلي کابلوف ونه ویل چې د ملګرو ملتونو د عمومي منشي په مشرۍ به دا غونډه، کله، چېرته او د کومو هیوادونو د استازو په شتون کې جوړه شي. د دې غونډې په جوړېدو سره به دا د افغانستان د چارو په اړه د ځانګړو هیوادونو دویمه ناسته وي چې د ملګرو ملتونو د سرمنشي په مشرۍ جوړیږي.
د افغانستان په چارو کې د روسيې استازي همداراز ویلي، چې په افغانستان کې د ملګرو ملتونو د سرمنشي ځانګړي همغږي کوونکي فريدون سېنيرلي اوغلو د افغانستان په اړه يو راپور چمتو کړى او د دغه هېواد په چارو کې یې د يادو هېوادونو استازو ته وړاندې کړى دى.
افغان دولت لا هم رسما ددې غونډې په اړه څه نه دي ویلي.