کابل کې د شرابو جوړولو یوه کارخونه ویجاړه شوه

عزم(سه شنبه، لړم۲۳مه، ۱۴۰۲): د کابل امنیه قومندانۍ په یوه خبر کې وایي چې په کابل ښار کې یې د شرابو د جوړونې یو کارخونه کشف او ویجاړه کړې ده.
ویل کیږي چې دا کارخونه د کابل ښار د لسمې حوزې اړوند په چارکلا کې کشف او ویجاړه شوې ده.
د لسمې حوزې امنیه قومندانۍ آمر عبدالرحیم اجمل رسنیو ته ویلي چې پرون یې د نشه یي توکو پر وړاندې د مبارزې مدیر او همکارانو په مټ د چارکلا اړوند سیمې په عایشې کوڅه کې د شرابو جوړونې یوه کارخونه کشف او ویجاړه کړه.
د یادې کارخونې په تور یو تن حوزې ته بیول شوی او نوموړي په خپل جرم اعتراف کړی.