عبدالرحمن السديس په ۳۲ ځل په حرم شريف کې د تراويحو ختم وکړ
مکه مکرمه(عزم ، پنجشنبه ۲۵ چنګاښ ۹۴ )د بيت الله شريف امام او نوميالی ديني عالم قاري (عبدالرحمن السديس) په ۳۲ ځل په رمضان المبارک کې د تراويحو د ختم وروستۍ سيپاره ولوسته او دعا يې وکړه.
د العربيه تيلويزيوني کانال د خبر له مخې د رمضان المبارک په مياشت کې چې په بيت الله شريف کې کومو قاريانو په تراويحو کې د قرانکريم ختم کاوه په هغوی کې قاري عبدالرحمن السديس هم شامل و.
نوموړي په حرم کې د قرانکريم د ختم په وروستۍ شپه وروستۍ سيپاره ولوسته او د قرانکريم د ختم دعا يې وکړه.
نوموړي له تېرو ۳۲ کالونو راهيسې په حرم شريف کې دختم تر څنګ د قرانکريم وروستۍ سيپاره او د قرانکريم د ختم دعا کوي.
په رمضان المبارک کې دعباداتو د فضيلت له امله ګڼ شمېر مسلمانان دعمرې د اداء کولو له پاره بيت الله شريف ته ورځي او د ختم په وروستۍ شپو کې د لمونځ کوونکو شمېر نور هم زياتيږي .
د يوې شمېرنې له مخې د تېرې شپې دختم په مراسمو کې شاوخوا شل لکه لمونځ کوونکي موجود وو.
عبدالرحمن السديس په ۱۹۶۰ ميلادي کال د فبرورۍ د مياشتې په لسمه نېټه د سعودي عربستان په البکيريه سيمه کې زېږېدلی ۱۹۷۹ زيږديز کال يې د رياض له علمي معهد څخه د قرانکريم د حفظ ممتاز شهادت نامه تر لاسه کړه او په ۱۹۸۳ ميلادي کال په ياده مدرسه کې د استاد په توګه وټاکل شو چې وروسته په جامعه اسلاميه او جامعه ام القری کې يې هم دقرانکريم د ښوونکي په توګه دندې ترسره کړي دي.
په لومړي ځل په د ۱۴۰۴/ ۸/۲۲ نېټه د يکشنبې په ورځ په بيت الله شريف کې د مازديګر د لمانځه امامت وکړ چې اوس هم د حرم شريف د امام او د حرم شريف د امامانو د رئيس په توګه دنده ترسره کوي.
عبداللطيف نظيف