پېښور: قاسم علي خان جومات دپنجشنبې ورځ لومړۍ روژه اعلان کړه

پېښور (عزم : چارشنبه ، غبرګولي ۲۷مه، ۱۳۹۴ل)

په پاکستان کې د تېرو کالونو په څېر سږ کال هم د يو ځای روژې  نيولو خوب پوره نه شو او يو ځل بيا د پېښور ښار مرکزي او مشهور جومات (قاسم علي خان جومات) د پاکستان د مياشتې دليدلو کميټۍ (هلال کميټۍ) د فيصلې په خلاف سبا(پنجشنبه) د روژې لومړۍ ورځ اعلان کړه.

د پېښور په قاسم علي خان جومات کې د مفتي شهاب الدين پوپلزي په مشرۍ د سيمه ايزو مشرانو او د جومات د منتظمينو له خوا نن د روژې د مياشتې د ليدلو له پاره غونډه وشوه  او سبا پنجشنبه يې لومړۍ روژه اعلان کړه .
رسنيو سره د خبرو پرمهال مفتي شهاب الدين پوپلزي وويل چې  د کوهاټ،چارسده،مردان او بنو په شمول څو نورو سيمو نه د روژې د مياشتې دلېدلو شهادتونه يې ترلاسه کړي،نو ځکه سبا د پنجشنبې ورځ لومړۍ روژه ده.

د قاسم علي خان د جومات له اعلان نه وروسته په پېښور،کوهاټ مردان،بنو او نورو سېمو کې سبا لومړۍ روژه اعلان شوه.

د يادونې وړ ده چې نن ماښام د پاکستان د مياشتې د لېدلو کميټې مشر مفتي منيب الرحمن وويل چې له ټول هيواد څخه يې هيڅ کوم شهادت تر لاسه نه کړ نو ځکه د جون ۱۹ نېټه د جمعې ورځ يې د روژې د لومړۍ نېټې په توګه اعلان کړه.

د يادونې وړ ده چې په پاکستان کې هرځل د پاکستان د مرکزي دولت او عامو پاکستانيو په دې اړه اختلاف موجود وي خو په پاکستان کې ميشت افغان کډوال بيا روژه او اخترونه له سعودي عربستان سره کوي.

عبداللطيف نظيف