د روژې لومړنۍ تحفه

د (روژې تحفې)د روژې د مبارکې میاشتې په مناسبت د پیاوړي لیکوال ښاغلي نثار احمد صمد صاحب ځانګړې او په زړه پوري سلسه ده چې هره ورځ به په یوه ارزښتناکه ډالۍ خپل مینوال نازوي.

اداره

د روژې لومړنۍ تحفه

لیکوال : نثار احمد صمد

ګرانو دوستانو ، د تیرو پنځو کالو غوندی یو ځل بیا ستاسو د معلوماتی خدمت لپاره حاضر یم او د مبارکی روژې په دې له برکت ، رحمت او مغفرت څخه ډکه میاشت کی به هره ورځ انشاالله یوه یوه تحفه درته وړاندی کوم .

خو د سږ کال ترتیب داسی دی چی هره ورځ به لس پوښتنی کیږی او تاسو یې لطفأ ځوابونه زما ایمیل ته راولیږئ . څلورو صحیح ځواب ویونکو ته به ( هغه چی نمرې یې تر نورو ډیری وی ) زما څلور ـ څلور جلده مختلف کتابونه په انعام کی ورلیږل کیږی انشاالله . خو شرط دا دی چی ځوابونه باید په صرف ۲۰ ساعتونو کی را ایمیل کړه سی ( یعنی د بلی تحفې تر خپرېدو مخکی ) . د صحیح ځواب ویونکو له منځه چی د هرو څلورو دوستانو نمرې زیاتی سی نو د روژې تر ختمېدو وروسته به هغوی ته اړونده انعام انشاالله ولیږل سی چی هغه زما دغه څلور جلده کتابونه دي : د پند او عبرت قصې لومړی جلد ؛ د پند او عبرت قصې دوهم جلد ؛ اخلاقی کنایې لومړی جلد ؛ قرآني ریاضی . نو لطفأ خپل صحیح ځوابونه را ایمیل کړئ او خپل انعام واخلیً .

ښه ، د تیر کال روژه خو د سترګو په رپ کی ولاړه او بله دا ده راغله . څومره ګران خپلوان ، دوستان ، ملګري او نا آشنا کسان سږ کال نسته او تر تورو خاورو لاندی دي !؟ آیا د دې ضمانت سته چی موږ او تاسو به روانه روژه پوره کړو ؟ آیا راتلونکې روژه به ژوندي یو ؟ آیا دا به مو وروستۍ روژه نه وی ؟ څوک پوهیږی او څوک یې ضمانت کولای سی ؟ نو راځی چی دا ثابته کړو چی موږ د نفس محکوم نه بلکی د نفس حاکم یو .

د روژې مبارکه میاشت درې لسیزی لری چی لومړنۍ یې د رحمت ، دوهمه یې د مغفرت او درېیمه یې له اوره د نجات لسیزه ده . څنګه چی نن د رحمت د لسیزی لومړۍ ورځ ده نو باید له خدایه رحمت وغواړو . والسلام ، ( ن . صمد nsamad57@hotmail.com).

پوښتنی :

۱ ـ تعوذ څه ته وایی ؟

۲ ـ تسمیه څه ته وایی ؟

۳ ـ د قرآنکریم د کوم سورت په هر آیت کی د ( الله ) لفظ موجود دی ؟

۴ ـ په قرآن مجید کی د ام القری څخه علاوه مکه په بل کوم نوم سره بلل سوې ده ؟

۵ ـ د قرآن شریف تر ټولو اوږد آیت کوم یو دی ؟

۶ ـ په روژه کی غرغړه او په پزه کی اوبه اچول ( چی تر ستونی تیری نسی ) څنګه دی ؟

الف : منع دی ؛

ب : جایز او روا دی ؛

ج : مکروه دی ؛

د : اختیاري دی .

۷ ـ د ګرمۍ د مخنیوي له پاره د غسل په کولو سره روژه څنګه ده ؟

الف : نه ماتیږی ؛

ب : مکروه کیږی ؛

ج : ماتیږی ؛

د : لمبېدل منع دی .

۸ ـ جهنم ( دوږخ ) چیری دی ؟

الف : تر اوو سمندرونو لاندی ؛

ب : تر اوو آسمانو پورته ؛

ج : تر اوو سمندرونو پورته ؛

د : تر اوو مځکو لاندی .

۹ ـ اسماعیل (ع) په خپل ژوند کی د کوم ښار مشري کوله ؟

الف : مکه ؛

ب : فلسطین ؛

ج : اورشلیم ؛

د : بیت المقدس .

۱۰ ـ په کعبه کی لومړنی ایښودل سوی بت څه نومېدئ ؟

الف : هبل ؛

ب : لات ؛

ج : منات ؛

د : سومنات .

او دا هم د نن زرین اصل : دلته هر څوک د خپلی راتلونکي د ښه والي په فکر کی دی ، لاکن دا یې هیره کړې ده چی : آیا آخرت هم راتلونکې نه ده ؟