د ډیورنډ فرضي کرښه ته څېرمه ۱۰۰ نوې پوستې جوړې شوې
عزم(سه شنبه، د وږي ۲۸مه، ۱۴۰۲): د دفاع وزیر مولوي محمد یعقوب مجاهد د ځانګړي امر په بنسټ د ډیورنډ پر فرضي کرښه ۱۰۰ تازه پوستې جوړې شوي دي.
دا پوستې په ننګرهار، کونړ او نورستان ولایتونو کې د ډیورنډ فرضي کرښې په اوږدو کې تاسیس شوي.
ویل کیږي چې دا پوستې په داسې ځایونو کې جوړې شوي چې د تېرې ادارې پرمهال، پاکستاني لوري اجازه نه ورکوله.
د سرحدي لوا د مسوولانو له انده چې دا پوستې یې له خپلې بودجې، امکانات او تخنیکي ټیمونو په مټ رغولي دي. د خالد بن ولید رض د ۲۰۱ قول اردو ویاند وایي چې د یادو پوستو د نښلونې په خاطر یې سړکونه هم غځولي دي. د دوی له قوله چې په دې چاره کې یې د هېچا فرمایشونه نه دي منلي.
دوی پر ډیورنډ کرښه مېشتو ولسونو ته ډاډ ورکوي چې د سر او مال ساتنه به یې کوي. له بلې خوا ډيورنډ کرښې ته مېشت ولسونه خوښ دي چې سیمو ته یې د اسلامي امارت پوله ساتو ځواکونو تاسیسات جوړ کړي.
دوی وایي چې په تېر کې به د دوی کورونه او مېنې په توپونو وېشتل کیږي، خو د اسلامي امارت په راتګ دا سیمې باامنه شوي. ویل کيږي د تېرې ادارې سرتېري د ډیورنډ له فرضي کرښې ۱۵ کیلومتره لیرې مېشت وو او زړه یې نه کاوه چې وړاندې سیمو ته ولاړ شي.