د زابل قومي مشران: د نظام ساتنې لپاره هر ډول قرباني ته تیار یو
عزم (دوشنبه، ۱/۳/۱۴۰۲): تېره ورځ د سرحدونو، قومونو او قبایلو چارو وزارت په همغږي د زابل ولایت د شینکۍ، اټغر او سیوري ولسوالیو له قومي مشرانو سره غونډه ترسره شوه.
دغه غونډه چې د یاد وزارت سرپرست ملا نورالله نوري، د زابل والي، د علماؤ شورا غړیو او ګڼو سپین ږیرو پکې برخه اخیستې وه، د ولس او نظام ترمنځ د متقابلو اړیکو په اړه پکې خبرې وشوې.
د لیدنې په پیل کې د قومي سپین ږیرو په استازیتوب څو تنو خبرې وکړې، د تېر اشغال ماته او د اسلامي نظام قائمېدل یې د قومونو د قربانیو او یووالي برکت وباله او څرګنده یې کړه چې: «موږ د دې نظام تر څنګ ولاړ او هر ډول قربانۍ ته تیار یو.»
قومي مشرانو د هیواد امنیت او یووالی بې ساري یاد کړل او له حکومت څخه یې د څلورو ولسوالیو د سړک رغېدو او د لوی پله جوړېدو غوښتنه وکړه.
بل لور ته د قبایلو چارو سرپرست قومي مشرانو ته د ستونزو د حلولو ډاډ ورکړ او ویې ویل: ستاسې ټولې ستونزې به موږ د حل په موخه تر لوړو مقاماتو رسوو.
ده زیاته کړه: «لکه څرنګه مو چې پرون جهاد یوه فریضه وه اوس مو د دې ولس ساتل، د دوی ستونزو حل کول، دوی ته خدمت کول یوه فریضه ګڼلې ده.»
سرپرست وزیر همداراز وویل: تاریخ مه هېروئ، افغانان په هر انقلاب کې اتلان لري، دا یو ډېر لوی تاریخ دی چې د شینکۍ سیوري او اټغر خلکو لوی ملا صاحب رحمه الله ته په خپله غېږه کې ځای ورکړی و.