ایران: د هیواد په لوېدیځ کې مو یوه اسراییل پلوې وسله ډله نیولې ده
عزم( دوشنبه، د غبرګولي لومړۍ: ۱۴۰۲): ایراني چارواکو په خپلو تازه څرګندونو کې ادعا کړې چې د اسراییلو اړوند یوه وسله ډله یې نیولې او دقانون منګولو ته یې سپارلې ده.
د ایراني د امنیت وزارت تېره جنوري هم اعلان کړی و چې دوه ډلې مو اسراییلو ته د جاجوسۍ پر تور نیولي دي.
د ایران د اطلاعاتو وزیر اسماعیل خطیب په خپلو خبرو کې منلې چې د اسراییلو اړوند یې ترهګره ډله د دوی د امنیتي ځواکونو له خوا نېول شوې او د پوښتنو ګروېګنو لاندې ده.
د “فارس” خبري اژانس د راپور له مخې، ښاغلي خطیب د یادې ډلې پر اړه کوم ځانګړي څه نه دي ویلي او نه یې پړ اړه کوم جزیات ورکړي؛ خو یوازې یې دومره څرګنده کړه چې دا ډله یې د ایران په لوېدیځه برخه کې نیولې ده.
دا خبر په داسې حال کې خپور شوی چې د تهران د اټومي پروګرام پر سر د ایران او اسراییلو ترمنځ ترینګلتیا زیاتېږي. د یاددونې وړ ده چې د ایران د امنیت وزارت مسوولینو په تېره جنوري میاشت کې هم د دوو ډلو د نیولو خبر ورکړی وو. د یاد وزارت د رسنیزو برخو مسوولینو په ډاګه نه کړه چې له دوی سره یې څه نیولي، خو دومره یې څرګنده کړه چې یادو خلکو امریکا او اسراییلو ته جاسوسي کوله.