ډان نیوز: د هغو افغانانو د وژنو پلټنه کیږي، چې برتانوي عسکرو بې ګناه وژلي
عزم (پنجشنبه، ۳/۱/۱۴۰۲): ډان نیوز په خپلې انګلیسي ګڼې کې د ملکي افغانانو د وژنو په اړه مطلب خپور کړی او د برتانوي رسنیو په حواله یې تائید کړې چې ډیر ژر به د بې ګناه وژل شویو افغانانو قاتلین پیدا شي.
ورځپاڼې لیکلي: «برتانوي حکومت د یو ازاد قاضي په مشري د ۲۰۱۰ او ۲۰۱۳ کلنو ترمنځ په افغانستان کې د غیرقانوني وژنو په اړه د یاد هېواد له ځواکونو څېړنې پیل کړې دي.»
مشر قاضي چارلس هیډن رسنیو ته ویلي: په څېړنو کې به ډير داسې نومونه هم راشي، چې موږ یې تمه نه ده کړې.
ډان نیوز زیاتوي: د ۲۰۱۱ او ۲۰۱۲ کال په شپنیو چاپو کې دوه داسې کورنۍ هم په نښه شوې چې وسله والو سره یې هیڅ تړاو نه و.
سیف الله نورزی چې د قرباني کورنیو له ډلې دی؛ رسنیو ته ویلي: خوشحاله یم چې ۱۰ کاله وروسته مو غږ اورېدل کیږي.
نوموړي ویلي: برتانوي ځواکونو زما د کور ۴ تنه په ډيرې بې رحمۍ شهیدان کړل. په دوی کې زما دوه وروڼه، یو ځوان خوریی او بل ملګری شامل و.
نورزی وايي: زما ملګری او وروڼه په داسې حال کې سر ته وویشتل شول، چې چای یې څښه.
دی زیاتوي: د وروڼو له مرګ وروسته مې کورنۍ له ډول ډول ستونزو سره مخ شوې.
باید وویل شي چې څو ورځې وړاندې په اسټرالیا کې هم یو تن عسکر د ملکي افغانانو د غیرقانوني وژنې په تور ونیول شو.
هېره دې نه وي چې برتانوي ځواکونو د اشغال پر مهال هلمند کې هوايي اډه درلودله او له همدې ځایه یې په شپنیو چاپو کې سلګونه افغانان وژل.