مزار شريف کې دخورشيد ټيلويزيون خبريال وهل شوی
مزار شريف(عزم:پنجشنبه،۰۱ زمری ۹۴) د خورشېد ټېلويزيون د سياسي خپرونو چلوونکی محمد امين بابک د ولسي جرګې د يوه وکيل د ساتونکو له خوا ډبول شوی. محمد امين بابک رسنيو ته ويلي چې د ولسي جرګې وکيل او د دوهم مرستيال نذير احمد زي ساتونکو پرې حمله کړې ده او د سوکانو او لغتو او کونداغونو په واسطه يې وهلی دی.
نوموړي وويل چې(( تېره ورځ له دندې څخه کور ته په لاره و چې د احمدزي ساتونکو لاره بنده کړې وه نو کله چې مې له دوی څخه د لارې د اخيستو له پاره هارن وواهه نو د وکيل ساتونکي راکوز شول او زه يې په داسې حال کې ووهلم چې ما ورته وويل چې زه ژورناليست يم)).
د خورشيد تيلويزيون د سياسي خپرونو مسؤل شاداب نيکزاد له پېښې وروسته سيمې ته رسېدلی او د وکيل نذير احمدزي پلويان يې ملي امنيت ته معرفي کړي دي.
له ژورنالېستانو څخه دملاتړ خپلواکې ادارې (نی) دغه پېښه غندلې او د کورنيو چارو له وزرات او ملي امنيت څخه يې د پېښې د جدي څېړلو غوښته کړې.
په عين حال کې د افغانستان د ژورناليستانو ملي اتحاديې د يوې اعلاميې په خپرولو سره ويلي چې په هيڅ دليل په ژورنالېستانو زياتې کول د زغملو وړ نه ده او ويلي دي چې دا د هېواد له قانون څخه سرغړونه ده او له عدلي او قضايي ارګانونو څخه يې غوښتي چې د پېښې عاملينو ته دقانون له مخې سزا ورکړي.
د يادونې وړ ده چې دا لومړی ځل نه دی چې په افغانستان کې ژورناليستان وهل کيږي تر دې مخکې څو ځله په افغانستان کې د چارواکو د ساتونکو او امنيتې ځواکونو له خوا ژورناليستان وهل شوي او رسنيز توکي او الات ورته مات شوي.
عبداللطيف نظيف