سپینه ماڼۍ له افغانستانه د امریکایي ځواکونو د و تلو څرنګوالی ارزوي

عزم( جمعه، وري څلورمه، ۱۴۰۲): سپینې ماڼۍ ویلي چې له افغانستانه یې د امریکایي ځواکونو د وتلو اړوند څېړنې کړي دي او ښايي راپور یې راتلونکې میاشت خپور شي.
د امریکایي چارواکو له قوله چې دوی د امریکایي ځواکونو د وتلو د څرنګوالي او ارزونې بشپړ رپوټ له اوږدو څېړنو وروسته چمتو کړی دی.
د سپینې ماڼۍ مسوولین زیاتوي چې د دې رپوټ جزیات به له کانګرېس سره هم شریک شي.
دا څېړنې د متحدو ایالتونو ولسمشر جو بایډن په امر شوي دي. نوموړي غواړي چې له افغانستان څخه د خپلو ځواکونو د وتلو څرنګوالی معلوم کړي. د دې ارزونې لومړنۍ پایلې باید په تېر اګسټ کې چې د امریکايي ځواکونو د وتلو له کلیزې سره برابره ده، خپرې شوې وای.
اوس د اسوشیټډ پریس خبري اژانس په رپوټ کې د امریکا د ملي امنیت شورا ویاند جان کربي له قوله ویل شوي چې دا پایلې به د راتلونکې اپریل میاشتې تر نیمايي پورې خپرې شي او درجه بندي شوې برخې به یې کانګرېس ته هم وړاندې شي.
جمهوریتپال په دې کمېټه کې اکثریت دي. همداراز د امریکا پخواني ولسمشر ډونلډ ټرمپ له افغانستانه د وروستیو امریکايي پوځیانو وتلو پر څرنګوالي هم سختې نیوکې کړې وې.
د راپورونو له مخې، امریکايي ځواکونو له کابل هوايي ډګر او نورو سیمو څخه د وتلو پر مهال لسګونه خرابۍ پرېښودې.
د شته معلوماتو له مخې امریکايي ځواکونو د کابل هوایي ډګر رادار هم لمنځه وړی و او لسګونه چورلکې یې ویجاړې کړې وې.
بل خوا امریکایي ځواکونو د دوی پر یو بل لوی مرکز بګرام کې هم ورته لسګونه ویجاړې تر شا پرېښي دي.