پند – قاري سعيد
د نازک خیال شاعر قاري عبدالستار سعید په زړه پوري شعر
اور په بل مکړه پیرزو خپله کباب شه
و هم نوعو ته ناجي له هر عذاب شه
ژوند بل څه ندی د خدای لوی امتحان دی
ښه آګاه یي له هر سوال او هر ځواب شه
فلسفه د ژوند له بلې خوا مه غواړه
په خپل کور شاګرد د خپل نازل کتاب شه
دا جیفه دنیا نور څه کړې زړه ترې ټول کړه
د عقبی او دین د لوړ فکر عقاب شه
هسې مه شه چې ټول خلک درته شا کړي
چې هر څوک درته کړي مخ لکه محراب شه
صداقت د ستر صدیق ځان کې پیداکړه
هم په عدل کې عمرابن خطاب شه
د حیا جوهر له کان د حیا واخله
په همت کې ستر علي ابو تراب شه
د مکار عصر له لومو ځان خبر کړه
ښه آګاه یي له هر آب او هر سراب شه
د ژوندون آزمون د غرونو ثبات غواړي
بې پروا د حوادثو له ګرداب شه
کړي سعید درته نعرې زلمیه ویښ شه
خبردار له خپل جوهر او له خپل آب شه