زابل کې د یونیسف په مرسته ۵۰ زره زده کوونکو باندې قرطاسیه وېشل شوې
عزم (پنجشنبه، ۴/۳/۱۴۰۲): په زابل ولایت کې د یونیسف نړیوالې ادارې په مرسته لسګونو زرو زده کوونکو باندې قرطاسیه وېشل شوې ده.
د یاد ولایت د پوهنې ریاست مرستیال مولوي محمد نسیم نصیر رسنیو ته وویل: د یونيسف په مرسته د مرکز کلات په ګډون د ټولو ولسوالیو له ۵۰ زره زده کونکو سره د قرطاسیو مرسته شوې.
نوموړي وویل: دغه مرسته پر هغو زده کوونکو وېشل شوې چې له لومړي ټولګي څخه تر شپږم ټولګي پورې زده کړې کوي.
ده زیاته کړه: له دې مرستې سره د زده کوونکو یوه برخه ستونزې حل شوې، خو لا نورو مرستو ته هم اړتیا لیدل کیږي.
باید وویل شي چې د زابل په ګډون یو شمېر ولایتونو کې زده کوونکي د کتابونو او قرطاسیې له شدید کمښت سره مخ دي.
د زابل ولایت زده کوونکو هر وخت له حکومت او مرستندویه ادارو هیله ښودلې چې غږ یې واوري.