د تېرې ادارې ځیني غړي له افغان شخصیتونو سره د تماس کمیسیون په همغږۍ هیواد ته راستانه شوي

عزم(پنجشنبه، تلې شپږمه، ۱۴۰۲): له افغان شخصیتونو سره د تماس کمېسیون په خپله اېکس پاڼه کې پرون د تلې په پينځمه د تېرې ادارې د دریو تنو د راتګ خبر خپور کړ.
په تېره اداره کې د سټاپ کالج قوماندانۍ د اطفایې آمر فضل احمد، د پروان ولایت د استیناف څارنوالۍ د احکامو د تنفیذ څارنوالۍ آمر شیرمحمد رمضاني، د ترانسپورټ وزارت مالي او اداري مرستیال غلام علي راسخ؛ هیواد ته راستانه شوي دي.
له افغان شخصتیونو سره د تماس د کمېسیون د بیان له مخې دا کسان له ایران هیواد څخه ددې کمېسیون په اسانچارۍ او همغږۍ هیواد ته راغلي.
یاده کوو چې دمګرۍ د تېرې ادارې سلګونه کارکوونکي له افغان شخصیتونو د تماس کمېسیون سره د اړیکې له لارې هیواد ته راغلي او اسلامي امارت یې د سر او مال د ساتنې ژمنه کړې ده.
کمېسیون موده وړاندې په هیواد کې د تېرې ادارې پر مېشتو افغان چارواکو د خوندیتوب کارتونه ووېشل. دا کارتونه نه یوازې هغو ته ورکړل شوي چې نوي راستانه شوي، بلکې هغوی هم ترلاسه کړل چې له فتحي سره سم له هیواد څخه ونه وتل.